筆者之前寫嘅文多數都係節錄以往嘅讀書或考牌筆記。畢竟個人知識能力有限，之後會嘗試分享一啲有趣或有價值嘅 Continuing Professional Development CPD 。今次 HKIS 搞嘅 Contractual BIM 就係有趣及有價值 CPD 好例子，我會以BS工程師嘅角度同大家分享所見所聞。
講起有價值嘅 CPD，即係有啲係冇價值嘅 CPD。參與過 HKIE CPD 活動嘅人都知，有時去到個演講嘉賓只係對住本 code / guidelines 唸經嘥大家時間。點解咁無謂嘅 CPD 都要搞？原因有可能係學會 Division 每年要追舉辨 CPD 數量嘅 KPI [1]，與此同時已獲得 MHKIE 嘅人每年要儲夠30個鐘 CPD (行緊 Scheme A 嘅要45個鐘) 兼且有審查機制 (有好幾個朋友被 HKIE 抽樣審查過)。就係咁，唔少情況下，兩者都係為做而做一拍即合。另外，筆者覺得舉辦線下活動嘅目的，就係為咗多啲面對面嘅交流，如果只係純綷知識分享，放個ppt及講稿上網比人自己睇已經得，唔洗嘥車錢嘥時間走一趟。好多時 HKIE 嘅活動搞手唔擅長現場交流嘅管理，以致好多人知道可以攞到張 CPD cert. 後就一哄而散。响呢度亦想提提打算儲 CPD 嘅 HKIE 會員，其實唔需要執著攞張 cert.，揀啲自己想聽嘅活動去就得。話說下x屆HKIE會長[2]陳帆曾經公開場合講過，好多種類嘅活動都計 CPD [3]﹕自己讀書睇書又計數、我呢啲寫 blog 分享都計、公司 in house training、甚至隔離位個同事幫你上堂亦計，只要你留返個紀錄就得；當然，筆者準備分享嘅 HKIS Contractual BIM 呢啲同行但唔係 HKIE 舉辦嘅 CPD 都可以計數。所以，筆者從來冇擔心過被 HKIE audit CPD。
講返正題，乜嘢叫 “Contractual BIM”? 簡單嚟講，即係個 BIM 會 contract binding。以常見嘅 Lump Sum Contract with Drawings and Specification [4] 為例，過往只有 Drawings (2D pdf hard copy) 及純文字版嘅 spec. 係構成合約；但今年以後嘅政府工務工程 [5]， BIM 都會成為合約嘅一部份。一直以嚟即使 Consultancy Agreement 有要求顧問嘅工程師用 BIM 都好，佢地多數只係沿用舊方法，即係 2D 出圖，然後搵 BIM team 求其起個模交功課，圖紙唔係由 BIM 直接生成。顧問呢啲取巧做法，如果單 project 涉及上萬張圖紙，作為甲方嘅業主係唔容易逐張圖同佢地對係唔係由 BIM 做 drawing generation，有時甚至係怕誤咗項目個大期，即使知道佢地取巧都唔敢捉。佢地今日敢 2D 3D 分家嘅主要原因係 - 過往顧問出 Tender 個 BIM [6] 只係比判頭 for reference only，甚至唔比個 BIM 佢地都得，design stage 個 BIM 係完全唔構成合約嘅任何一部份。但 BIM 要 Contract binding 後，相信上述取巧嘅做法會成為絕响，顧問工程師不得不認真對待個 BIM，因為個 BIM 畫多、畫少、畫漏、畫錯任何嘢，都可以成為判頭 claim VO 嘅理由。
今次個 CPD 係業界中人分享一個私營項目 BIM Contractual Binding 嘅實戰心得，筆者歸納 BS工程師值得注意嘅重點﹕
1. 對大判嘅合約會用以下一段文字，雖然有啲長，但照quote晒出嚟，我認為係成個 CPD ，甚至係目前為止 BIM Contractual Binding 最精華核心嘅部份﹕ "The Main Contractor shall note that not all the scope of works are shown in the BIM model and in case there are discrepancies for particular elements / items of works found between the Contract Drawings and the BIM model, the Main Contractor shall refer to the “List of BIM Model Elements” and “Revit Structural QTO model - Notes on use” as attached the Drawings for the elements / items of works being taken precedent under the Contract Drawings of the BIM model. For any information of elements / items of works not being shown in the BIM model, the Contract Drawings shall prevail”
即係界定清楚，只有個 BIM 入面嘅某啲指定部份 (model / information) 先係Contractual Binding，而唔係成個 BIM 任何部份都 Contractual Binding，呢點可以令甲方更為放心；至於 BIM 入面唔會有嘅嘢，如 construction details，就指返向傳統圖紙。
2. 暫時佢地只係鋼結構、石矢結構、建築圖紙係 BIM Contractual Binding， BS等機電暫時係冇包在內。原因係，Contractual BIM 要向前行一步，點都要搵啲佔單project個價有返咁上下比重、大大件而又相對簡單嘅嘢行先，上述嘅建築/結構就乎合呢啲條件；BS 機電嘢處理起嚟會相對複雜，如 MiMEP 或某啲系統 ，好多時顧問出標嘅設計階段係做唔到 detail design，要交由 construction stage 個 contractor Design & Build 或 specialist contractor 做深化設計，呢啲情況下行 Contractual BIM 嘅意義不太大。換言之，以機電嚟講， tender design 部份同個 as-built 越接近，行 Contractual BIM 越有價值。
3. 行 Contractual BIM ，顧問費肯定要加。現時進行中嘅工程顧問合約，好多時顧問係唔負責更新 design stage 個 BIM [6]。佢地 construction stage 點出 Architect Instruction AI? 一般係顧問人手 mark 修改落 tender / contract drawings 嘅 2D 圖紙，然後飛紙仔比 contractor，同一時間顧問嘅 CAD team 跟據呢啲紙仔更新 2D GBP / drawings，最後用呢堆 2D 入 final statutory submission。日後要求顧問以 BIM 出 AI 及對 VO 數，意味住佢地到 construction stage 都要實時更新 design stage 個 BIM，服務多咗，自然顧問費會多咗。加完顧問費對件事有冇幫助？演講嘉賓們係比出肯定嘅答案，認為除咗目前提升咗成單工程嘅效率外，長遠而言，係能夠推動成個建築工程行業健康發展，落標嗰陣雙方嘅訊息更準確透明，業主可以少花冤枉錢、承建商亦唔洗靠估估下撞手神先賺到錢。如果要進一步量化 Contractual BIM 帶嚟嘅好處，我諗可能要搵學院嘅教授們做 studies / research 深入分析先得。
4. Contractual BIM file format 問題，採用 openBIM 係未來嘅方向。先講講乜嘢係 openBIM。我地平時用開嘅 BIM 軟件 Revit， save 出嚟嘅係 *.rvt 檔，呢隻係 Revit 專用嘅格式。openBIM 係一個 BIM 共通格式規範 *.ifc，任何軟件都可以管理或修改 BIM 個 *.ifc 檔。舉個比喻，就有啲似 AutoCAD 年代嘅 *.dwg 檔，*.dwg 係某一家公司嘅檔案格式；但 *.pdf 就係一種開放嘅檔案格式，大家都可以自由開發可讀取或修改 *.pdf 檔案嘅軟件。不過 openBIM 並唔係十全十美嘅檔案格式，首先 *.ifc 出唔到 2D 圖紙，好難想象未來十年甚至廿年嘅建築現場施工 / A&A works 係可以完全離開 2D ；另外，save *.ifc 檔嗰陣，無論用任何版本嘅 ifc [7]，都會出現難以預計嘅 data loss，即係 save 完做 .ifc 後個 model 會有邊舊嘢冇咗/爛咗/斷開咗，邊啲 information 冇咗，係難以估計；再者，*.ifc 雖然理論上係可以攞去其他軟件 edit，但實際上唔係咁易，存在好多 bugs。就好似你將個 excel file save 做 pdf 檔後有嘢要再修改，你唔係修改個 excel ，而係修改個 pdf。係唔係修改唔到？唔係，顧問們最常用嗰隻廉價軟件 PDF XChange Editor 已經修改到；但你話好用咩？一啲都唔好用，改一、兩隻字都仲可以，如果要加多一行，保證煩到你喊。順帶一提，EMSD 下年將會出 BIM-AM Standards 4.0，當中主要係更新 openBIM 嘅應用。可見得，openBIM 肯定係主流方向，但目前仲有好多難題係未克服。
後記﹕筆者每次向行業中人提及 BIM Contractual Binding，佢地都會表示恐懼及震驚。我覺得既然係大趨勢，倒不如主動啲去迎接，就好似2017年發展局強制3,000萬以上嘅工務工程強制行BIM開始，建築數碼化係一個不可阻擋嘅趨勢嚟，嚟緊仲有一系列嘅強制性 BIM 要求陸續有來，如 BD BIM GBP submission 等 [8]。同時見到 BS 行 BIM 係相對走得較後，一嚟 BS 係難以脫離建築/結構獨立存在；二嚟 HKIE BSS 界幾乎冇人投入 BIM 嘅發展或建立行業標準指引，有嘅一個半個都只係為自身利益，唔係為行業發展[9]。咁我地 Building Services 以後 BIM 發展可以何去何從？睇嚟筆者惟有寫多啲 BS工程應用 BIM 嘅分享。
嚟緊 HKIS 好似會有政府 pilot projects BIM Contractual Binding 嘅分享，筆者有幸能參與的話，會及時為大家更新。
[1]: HKIE BSS Division, past sessions, Chairman’s Report: https://www.hkie-bsd.org/en/content.php?wid=4
[2]: 昔日東方 - 政情：工程師學會交棒 副會長輪到陳帆
[3]: HKIE CPD: https://www.hkie.org.hk/zh-hant/quali/cpd/
[4]: 見筆者前文<香港Building Contract合約形式>
[5]: 其實都唔係啲乜新鮮嘢，2021年發展局 DevB Technical Circular (Works) No. 2/2021 已經咁寫﹕ - …ultimate goal to include BIM models as part of tender information for electronic tendering (e-tendering) and make them contractually binding. 聽聞今年2024年嘅 Technical Circular 會搣走 "ultimate goal”, BIM Contractual Binding 將正式落地
[6]: 筆者盡量用簡單易明嘅字眼。至於DIM, cPIM 等 BIM 世界專業字眼，可以參考 CIC BIM Standards - General (Version 2.1 – 2021, with Hong Kong Local Annex of ISO 19650-2:2018) 。筆者係制定呢本standards嘅Person-in-Charge (PIC)。
[7]: https://technical.buildingsmart.org/standards/ifc/ifc-schema-specifications/
[8]: https://www.devb.gov.hk/filemanager/en/content_2373/BIM-Book-content-en.pdf
[9]: 見筆者前文<如何面對工程界職場霸凌？> CC君嗰段
