閒話當年 - 顧問公司因為個洗手間出咗名

筆者大學畢業後做嘅第一間工程顧問公司(個廁所)响業界相當之有名。

話說一層樓百幾人，男廁表面上有三、四格，尿兜又有幾個。但實際上，多數時間只有一、兩個用到，返返下工人有三急嘅時候真係GG...

記得有一次，有個廁格啲排泄物浮出嚟，搞到成地都係。有同事唔小心踩到後踩返入office，跟住成間office一浸屎味。跟住踩屎嗰個同事眼泛淚光咆哮﹕「點解﹗點解呀﹗😭 我打份工姐，點解會响人類嘅洗手間踩到人屎㗎﹗﹗﹗」

當年好多同事反映，每次屙屎後沖廁，腎上腺素係會隨住馬桶水位上升而上升 --- 一個緊急轍退嘅訊號，再唔走就成鞋都屎。

即使咁惡劣嘅廁所環境，我有次竟然聽到有人响廁格入面打鼻鼾。斷估嗰位人兄應該OT過勞。

再睇下惟一一個殘廁嘅貼圖﹕


HR: "同事們﹕請愛護我們的殘廁，勿噴屎﹗"。可以睇得出，即使係殘廁，個condition都唔好得去邊。

有唔少同事開大或細，都會走過隔離啲冇上鎖嘅工廈洗手間，或走去遠啲嘅APM。冇計，人有三急都好，有啲嘢真係好難接受。

當然，廁所淤塞有時唔怪得晒公司，有啲人好鐘意屙屎前，掟一大堆廁紙落馬桶，搞到沖唔到水然後排泄物浮晒出嚟。同時亦見到，有個好嘅洗手間係有利優化人力資源。聽聞筆者呢間舊公司個廁所已經重新裝修，以後各師兄師弟應該有個更舒適暢快嘅屙屎環境。