幾年前我的某男性朋友去Speed Dating, 主辦單位要求男參加者係專業人仕、女嘅冇記錯係要求32歲以下。全場三十人，十五男，十五女。一開始係隨機分派兩男及兩女共四人响同一張枱先食一餐飯。剛開始食飯嘅時候，只有女A及女B, 佢地係互相認識；再加埋我某男性朋友，而另一個男參加者遲到，以下係佢地三個人嘅談話內容﹕
女A﹕ 你係做乜職業？
男性朋友﹕Building Services Engineer, 即係做N展
女A (黑面，皺晒眉頭)﹕下？﹗乜N展都可以算係專業人仕嚟架？我係諗住嚟識律師醫生呀﹗
女B﹕ 你介唔介意講講你一個月搵幾多？
男性朋友﹕...嗯，唔係多，但都可以嘅。
之後女A及女B全程兩個自己傾計玩手機。
故事講完。某啲價值觀，我冇興趣評論，人各有好。但呢件事引起我尋根究底嘅興趣，究竟香港做BS工程師係唔係真係咁不濟？BS 同其他行業嘅橫向比較又如何？BS Engineer同上述故事女主角心目中嘅神科醫生人工差幾遠？
-----------------------------------------------------------------------------------------------------
响分析之前，先睇睇某三個BS工程師大學畢業後(14年經驗)於私人市場之待遇﹕
上述三個BS工程師都係行HKIE Scheme A開始及已考齊牌[1]。由上圖大概估到佢地係邊年考到牌或跳槽。截至今日，佢地分別係做緊Client Side / Main Contractor BS Manager / Sub Contractor PM.
或者又有人會問，我憑啲乜信你上面個表係真？某登成日有人話BS人工好低㗎喎。有見及此，我可以比兩個旁證大家參考。
旁證一﹕某個九年經驗齊牌嘅 BS Main Contractor Senior BS Engineer [2] 於2018年嘅糧單，見下圖。該BS工程師月底薪為$72,750 (上述銀碼未包括第十三個月糧及1.5個月Bonus)，如果計埋的話，平均月底薪為$87,906, 見上圖紅色之「旁證一參考點」。上述三個私人市場BS工程師人工均低於此參考點，可見其真實性。
旁證二﹕PolyU Department of Building Services Engineering同HKIE Building Services Division响十二年前出過份報告，叫做"Changes for the betterment of the Building Services profession in Hong Kong - final report of the research study on Hong Kong's Building Services profession - with a view to enhancing the future roles and functions of Hong Kong's Professional Building Services in society" 裡面嘅第4.4.1 Influences of years of experience and job field, Figure 4.3, 有一個121人樣本嘅薪酬調查，可以見到2010年即係十二年前嘅時候，11-15年經驗BS Engineer平均年薪為五十萬(約月薪四萬二)；假設你努力啲學多啲嘢早啲考到牌，唔需要做到最叻嗰批(年薪一百萬)，但又跑贏到平均數(年薪五十萬)，設做到平均數同最叻之間嗰批嘅水平，即係大概係Top嗰25%, 2010年嘅時候年薪約係七十五萬，見下圖2010年嘅數據﹕
之後再估算下呢十二年嚟薪金嘅增長。我地可以參考政府Master Pay Scale MPS嘅歷史，2010年時候嘅point 32係$46490; 今日2022年嘅point 32係$70465, 升幅係約152%; 再忽略近呢十二年嚟建築業比起整體市場增長更快嘅紅利，可以計到有大概14年經驗嘅BS工程師會有$750,000 x 152% = $1,140,000 年薪($95,000月薪)。
如果只係做到平均水平又大概有幾多人工？$500,000 x 152% = $760,000 年薪 ($63,333月薪)。
上述三個私人市場BS工程師(14年經驗)於2022年之人工範圍係$72,000至$90,500, 與上述調查報告之$63,333至$95,000相若。足以證明其可信性。
-----------------------------------------------------------------------------------------------------
香港做工程，i. 唔努力、唔學習；ii. 唔考牌；iii. 唔過塘係唔會肥。
先講iii. 唔過塘，你唔跳槽唔扭計唔跳草裙舞唔大膽啲要求加人工，香港工程公司嘅老細係唔會無啦啦良心發現幫加人工比你。
跟住講i. 唔努力、唔學習。响呢度我要對於努力作出清晰啲嘅定義。香港工程界係有唔少人鐘意用戰術上嘅勤力，去掩蓋自己戰略上嘅懶惰。
此話何解？舉個例子，有啲人會响唔太多新嘢學習嘅重複性工作上好勤力，即使老細塞幾多唔合理嘅workload比你，要你日日OT到十二點星期六日貢獻埋出嚟都逆來順受，認為咁做就係努力咗，社會就應該比返相應嘅回報比你。呢啲就係所謂戰術上嘅努力。但呢類努力並唔會令你個人能力上增值，只係簡單地用時間生命去換份糧。同時，佢地好少會响個人嘅職業生涯規劃、考牌跳槽升職加薪、改善優化工作流程、建立人冇我有嘅技能護成河、多元成長學習等呢啲戰略層面上嘅嘢作出努力。要知道，上帝只會眷顧同時响戰略及戰術上都努力嘅人。
最後講ii. 唔考牌，建議參考<BSE考工程師牌>等本blog一系列文章。BSE市場上有牌同冇牌嘅工程師人工係可以差好遠，稍後再分析。
一個响私人市場做嘅BS工程師，做Client也好、顧問也好、Main con / sub con 都好，有十零年經驗同時又做得晒上述三項嘅BS工程師，最低限度月薪有六萬以上，當然有唔少係可以去到九萬或以上。
香港某啲頭部公司會夾埋啲甚麼人力資源顧問董事總經理之類响網上或forum或透過媒體吹風惡意撳價，令好多BS從業員唔敢跳槽叫價，BS工程師人工方面雖然唔係高，但都仲係好過唔少行業。
-----------------------------------------------------------------------------------------------------
近期經濟一週有文章指，BS工程師只有教師一半人工，但實情並非如此。以下再以上述三位私人市場BS工程師於過往十四年之平均薪酬與中學教師(CM & GM) [3] 作比較﹕
的確，剛畢業嘅頭五、六年，私人市場工作之BS工程師人工係低中學教師唔少，但隨住考牌或跳槽後，人工係穩定地高過中學教師。
所以筆者建議，如果你有BS工程師牌，跳槽時叫價唔好低過以下建議月薪﹕
呢個最低薪金建議係點嚟？以下係我推論﹕
1. 考牌前都冇乜叫價力，被人壓價都冇計，見上；
2. 一般而言，最快考到牌要六年時間；
3. BS工程師考牌後，人工係穩定地高過中學教師，見上表。
上圖紅線所示係三個14年經驗私人市場齊牌BS工程師之平均月薪，以2022年計，平均為$81,833; 而同期14年經驗之GM中學教師月薪為$68,975. 綜合上述實況，假如一個14年經驗齊牌嘅BS工程師人工跳槽時叫價，係唔應該低於$68,975.
至於BS同其他行業如教師/護士/紀律部隊/EO等橫向比較，以及作為BS人如何响歐美政府濫發鈔票嘅時代保住財富，詳見<BS人之「認命」與「唔認命」>一文。
-----------------------------------------------------------------------------------------------------
最近被唔少好友私訊同筆者講本blog被貼咗上連登
https://lihkg.com/thread/2963993/page/1
筆者嘗試集中响呢度回應﹕
留言主要分三大類﹕ 1. 正面嘅； 2. 灌水負能量嘅； 3. 中性嘅；先回應
1. 正面嘅。
筆者回覆﹕講句多謝先，承蒙厚愛。事實上筆者對BSE知識海洋嘅掌握度不足1%, 如果大家發現有乜錯漏及補充，歡迎响度留言。
2. 灌水負能量嘅。有下列幾大類﹕
i. BS係最低等，如"BS被狗做" "唔好害人入BS" "BS係最低等生物" "三沙/civil inspector都撚到BS" "BS仲賤過地盤雜工"
筆者回覆﹕每個行業/每個位置都有佢嘅難處。就算做到今日嘅首富，Tesla嘅老大Elon Musk, 對內要面對董事會嘅壓力，對外要面對沽空機構等狙擊/生產線交付質量等壓力。某啲人真係以為做業主PM做上家就冇壓力？佢地揼唔到判頭準時起貨或交貨質量唔達標，一樣會被董事會/CEO掃地出門﹗幾年前銅鑼灣某新project某BS底嘅業主PM就係呢個原因被炒。
ii. BS人工不如Nursing/Civil/IT/會計/燒焊
筆者回覆﹕建議佢地自己搵啲數據嚟睇下先 e.g. csradar.com，唔好人云亦云。冇錯BS唔係好搵錢嘅行業，但總算係比上不足，比下有餘。大家細心留意下就會發現，响連登大力踐踏BS嘅，來來去去都係嗰幾個ID; 由佢地嘅發言亦可以見到，佢地只係一小撮唔願意努力，同時又要求百萬年薪嘅人；又或自己被無良僱主壓價underpaid但又以為全世界嘅人同佢待遇相同。對呢種日夜怨婦式散播負能量嘅人，正確嘅態度係一笑置之😀。
iii. BS技術十年如一日
筆者回覆﹕事實上BS上嘅技術係日新月異，只係睇你有冇應用。
例如有啲嘢明明可以用新技術取代舊有做法，如Engineer直接用BIM一炮過出圖及做pipe/equipment schedule; 但總係有人要堅持最傳統嘅做法，先由Engineer慢慢hand draft張圖，人手計數入excel, 手做做pipe/equipment schedule, 最後先交比BIM modeler入機出圖。由於冇single source of truth, 圖紙同schedule唔對口嘅情況經常發生。舊做法唔單止double handling 費時失事外，交貨嘅質量都低。
又例如，內地好多年前已研究自動生成 schmatic drawing, 個程式雛型已可用。但香港呢...普遍機電顧問仲係用緊啲十幾年前嘅工作方法。
再例如psy chart 揀機等，有人係十年如一日咁做，但一樣有人係可以自己寫Programme (plumbing man 水喉佬) 用更聰明更高質量嘅方法去做。
3. 中性嘅。有下列幾大類﹕
i. BS好多人嘅人工被卡死某個位
筆者回覆﹕詳見本文。跟據筆者咁多年嘅觀察，i. 唔努力學習；ii. 唔考牌；iii. 唔跳槽，係冇老細會咁良心無端白事加人工比你。
ii. 考到牌去Main Con做BSM有七、八皮個月
筆者回覆﹕屬實。
如果有十幾年經驗，當中有八年以上係main con經驗兼熟BIM (有CCBM資格, 兼熟到足以兼任埋Project BIM Manager), 係去到九萬幾至十零萬；
如果只係九年經驗齊牌嘅Senior BS Engineer，2018年嘅價大概係有八萬幾 (見上)。
當然，筆者只知道身邊朋友/大同有限嘅數據，有冇其他人更好搵嘅就不得而知。
iii. BS行內叻人都爭住入政府，政府人工太高
筆者回覆﹕對比起市場有牌BS工程師嘅均價，的確政府工程師個價係偏高，當年挑戰立法會工程界別嘅黃偉信都提出過呢個質疑。但同時要知道，响私人市場撈得掂嘅BS工程師，如某公營機構嘅工程總監，或某顧問/判頭公司嘅Managing Director, 人工係遠遠高過政府D1嘅Chief Professional.
iv. 考牌要乜都識，同埋好多潛規則
筆者回覆﹕
關於考牌內容，詳見本blog一系列關於考牌嘅文章，e.g. 面試問啲乜；Essay考啲乜 etc.
潛規則方面，香港考牌潛規則，當年被喻為五大歧視﹕
1. 唔夠年資被歧視，理得你曾經起過火箭。顧問少過六年，或判頭少過十年，去到被玩嘅概率好高。想肥你，千千萬萬種問法可以整死，詳見<面試問啲乜>
2. 做FS/PD被歧視，FS E3 renewable/energy嗰部份好易被人搞；PD就A1, A2容易被人搞，詳見<寫考牌報告Step by step>
3. 冇圈中人加簽的話，自求多褔；
4. 判頭出身，尤其係大判，最被歧視；
5. 冇master被歧視，最主要係太多人有，你冇的話觀感上好突兀。不過呢個歧視比起上述四個，呢個算係最輕嘅一個。
v. 考牌要master
筆者回覆﹕詳見本blog<BS考牌學歷要求>一文。
-----------------------------------------------------------------------------------------------------
以下我再以今年考完DSE後走上BS工程師或專科醫生之路做比較。
假設---
走BS工程師之路﹕今年入讀PolyU Building Services Engineering, 完成四年制課程後，進入政府當Engineering Graduates見習工程師兩年並完成HKIE Scheme A training. 完成後晋升為政府Assistant Building Services Engineer助理屋宇裝備工程師，兩年後成功考取工程師牌[1]正式成為政府Building Services Engineer 屋宇裝備工程師。
以下係行BS工程師之路嘅薪酬趨勢﹕
走專科醫生之路﹕今年入讀HKU MBBS (即係醫科) ，完成六年制課程後，進入醫管局(醫管局醫生並非公務員)當Housemna實習醫生。完成Houseman後開始做Resident註院醫生並進行為期六年嘅專科培訓(暫假設為最大範嘅內科)，完成後正式成為專科醫生。
以下係行專科醫生之路嘅薪酬趨勢﹕
講到呢度，某登有人走嚟枱槓[4]，認為上述只係用人地最低嘅價嚟比較BSE最高嘅價。其實呢，比較係要Apple to Apple, 即係要有某啲地方一致嘅基礎下，再就某啲有差異嘅地方進行比較，以上就係以同齡嘅情況下入唔同科，到畢業後於政府/公營機構工作，再攞齊專業資格後嘅比較。如果用潘樂陶收入對比某醫生開街坊診所收入，就冇乜比較嘅意義。此外，枱槓者似乎係刻意忽略開始時列舉之私人市場及PolyU HKIE 研究報告的薪金數據，同時想象醫管局醫生係最卑微嘅一群(醫管局員工並唔係公務員)。其實留意下數據就知道，香港有六成醫生係响政府/公營工作，如果真係如枱槓者所講一出私家就月球人，相信今日唔會仲見到六成人願意留响度。
----------------------------------------------------------------------------------------------------------
至於何解香港工程師响某啲人心目中嘅形象咁低，呢個問題可能就要交返比香港工程師學會會長及代表工程界別嘅尊貴議員。
註﹕
[1]: 考取BS工程師牌
[2]: 以Main Contractor嚟講，大學畢業後，一般0~4年經驗會係Assistant BS Engineer; 3~8年會係BS Engineer; 6~12年係Senior BS Engineer; 10~15年係Assistant BS Manager; 15年以上會係BS Manager
[3]: 教聯會
[4]: 枱槓 Wiki: 抬槓指採用不切實際的論據材料和論證方法以論證、爭辯一個問題。
沒有留言:
發佈留言