BSE Sharing: [BS] 問﹕响香港BS業界有時會聽到"某某人有工程師牌"，點先算係"有工程師牌"？

答﹕

香港主流係用"英國牌"同"香港牌"兩種。

----------------------------------------------------------------------------------------------------------

先講英國牌

以某人陳小明 Chan Siu Ming 為例，你可能响佢卡片度見到

"Chan Siu Ming MCIBSE, CEng"

MCIBSE = Member of Chartered Institution of Building Services Engineers英國屋宇裝備工程師學會會員，係由英國學會Chartered Institution of Building Services Engineers CIBSE 頒發；

CEng = Chartered Engineer 英國特許註冊工程師，係由英國Engineering Council EC頒發；

CIBSE係由EC監管，EC下面仲有三十幾個學會，而香港Building Services業界承認嘅只有CIBSE, IMechE, IET, 至於點解，之後會再詳細講。

要留意，有"MCIBSE"唔一定擁有"CEng"; 但有"CEng"就一定會有EC旗下其中一個學會嘅正式會員資格。成日會聽到人話某人"charter咗"，即係攞咗CEng, 見下圖﹕

----------------------------------------------------------------------------------------------------------

再講香港牌

同樣以某人陳小明為例，佢卡片可能係

"Ir Chan Siu Ming MHKIE(BSS), R.P.E.(BSS)"

MHKIE = Corporate Member of Hong Kong Institution of Engineers 香港工程師學會會員；香港工程師學會係由香港法例第1105章<香港工程師學會條例>下成立嘅法定機構；

(BSS) = Building Services Discipline, 係HKIE下面廿幾個專業界別入面其中一個；當然仲有其他專業介別，如(MCL) = Mechancial Discipline; (ELL) = Electrical Discipline;

Ir = Engineer, 只有獲得MHKIE資格嘅人先可以响個名前面放"Ir". 根據MHKIE張證書所講，"Ir" pronounced as "engineer" is the abbreviation for the prefix of Corporate Members of the HKIE; 至於點解Engineer 係Ir? 據頭條日報[1]所講，工程師學會晚宴上主席話，工程師Engineer係來自拉丁文"Ingeniator", 再拆解分別係由"ingenium(聰明)及ingeniare(創造)組成；

*延申一下，最近MHKIA嘅建築師都會响名前放"Ar."; 有MHKIS嘅測量師會放"Sr"; 留意，"Ar."後面係有一點".", 而"Ir" "Sr" 後面係冇一點；

R.P.E. = Registered Professional Engineer 註冊專業工程師，係由香港法例第409章<工程師註冊條例>下嘅"工程師註冊管理局"所頒發嘅專業資格；如果你已經攞咗MHKIE(BSS)滿一年, 只要交每年$600比"工程師註冊管理局"，就一定可以攞到R.P.E.(BSS); 即係有MHKIE, 不等於一定有R.P.E.; 但有R.P.E., 就一定有MCIBSE/MIMechE/MIET + CEng or MHKIE. 至於攞R.P.E.有乜用？下面會再講。要留意一下，响香港，任何人都可以自稱"工程師"，但"註冊專業工程師"或"Registered Professional Engineer R.P.E."呢個稱呼或類似稱呼係受法律Cap.409<工程師註冊條例>規管，真係有呢個專業資格嘅人先可以用此稱呼。類似"醫生" "建築師"，响香港呢啲稱呼都係受Cap.161<醫生註冊條例>; Cap.408<建築師註冊條例>所規管。

----------------------------------------------------------------------------------------------------------

再落嚟講講上述英國牌同香港牌响香港認受性。

以政府招聘"Building Services Engineer 屋宇裝備工程師"或普遍香港Client聘請BS Consultants時所用嘅Consultancy Agreement對BS Engineer要求為例，會以下列條件要求一個有"BS工程師牌"嘅人﹕

1. "Possess Corporate Membership of Hong Kong Institution of Engineers or Registered Professional Engineer (Building Services, Electrical or Mechanical Discipline)" ;

2. "Possess Corporate Membership of Hong Kong Institution of Engineers or Registered Professional Engineer (Building Services, Electrical or Mechanical Discipline)" or equivalent; [ArchSD "List of Consultants of Architectural and Associated Consultants Selection Board AACSB"對於on list嘅Building Services Consultants就有2.呢個要求]

3. with at least XX years' relevant post-professional qualification;

逐點講解，先講解1.

1. 即係只有MHKIE(BSS/ELL/MCL); or R.P.E.(BSS/ELL/MCL)先乎合資格；

如果請人嘅要求係2., 咁邊個牌先乎合資格？

當然MHKIE(BSS/ELL/MCL)或R.P.E.(BSS/ELL/MCL)系列一定乎合資格，但乜嘢叫"or equivalent"就要去返HKIE嘅網站睇邊啲英國學會係同HKIE嘅BSS, ELL, MCL有Reciprocal Recognition Agreements (RRAs) 專業資格互認協議[2]之餘，再要睇埋HKIE嘅Form 14343 Professional Qualifications for Corporate Membership Exemption from Professional Assessment[3]

先講MHKIE(BSS)有專業資格互認嘅學會，只有Note J 嘅CIBSE; 除此之外仲有一系列嘅條款，包括i. 已攞到MICBSE, 而個MCIBSE係經CIBSE所舉辦嘅考試攞到，及 ii. 已攞到CEng, 而個CEng亦都係成為MCIBSE後經由CIBSE舉薦獲得，及 iii. "their substantive training and experience in building services jurisdiction", 呢個"bs jurisdiction"解釋權係响審批你資格個機構(呢個例子係HKIE)嗰度。乎合晒上述三個條件，先可以算係"equivalent". 亦即係，經一啲相對較易攞會員資格嘅學會如MSOE/MIET轉會攞到嘅MCIBSE, 就唔乎合i. 及 ii.嘅要求；又或你嘅MCIBSE+CEng係經 i. 及 ii. 攞到，但審批機構(今次可以係Client)睇過你過往做過嘅嘢後唔認為可屬於BS範疇的話，一樣可以有權拒絕承認你嘅資格equivalent to MHKIE(BSS).

再講MHKIE(ELL)有專業資格互認嘅學會，有Note U嘅The Institution of Engineering and Technology IET 及 Note C嘅China Associatoin for Science & Technology CAST 中國科學技術協會。後者筆者做BS咁多年嚟都未見過，只集中講前者。要同HKIE(BSS)嗰三個條件基本上一樣，只係換咗CIBSE做IET, building services 換咗做electrical.

再講MHKIE(MCL)有專業資格互認嘅學會，有Note AA 嘅The Institution of Mechanical Engineers IMechE; Note S 嘅The Society of Operations Engineer SOE; 及Note T嘅 The Chartered Institution of Water and Environmental Management CIWEM; 由於CIWEM咁多年响香港BS industry我都未見過，暫時先skip; 而MSOE响香港BS業界嘅認受性普遍存疑，兼且Note S 第三段清楚指出任何FSOE+CEng想經RRAs獲得MHKIE(MCL)必需重新考試，呢個條款係經CIBSE/IET/IMechE RRAs 到HKIE都冇嘅，所以MSOE+CEng不被視作為MHKIE(MCL)嘅equivalent. MIMechE同上述三個條件一樣，只不過係CIBSE換做IMechE, building services 換做mechanical.

要求3.即係獲得MCIBSE/MIET/MIMechE + CEng(滿足i. ii. iii.三個條件) or MHKIE or R.P.E.後，有幾多年相關工作經驗。如果係獲得以上資格加五年經驗，一般會講成係C+5;

----------------------------------------------------------------------------------------------------------

响香港BS industry, 攞BS工程師牌嘅途徑普遍會係點？

一般人都係先攞英國牌MCIBSE/MIET/MIMechE+CEng, 然後再經RRAs轉返MHKIE(BSS/ELL/MCL)及R.P.E.(BSS/ELL/MCL)

BS人主要考MCIBSE+CEng, 以前有兩個途徑，一個係搭飛機過英國CIBSE考，一個係香港CIBSE HK branch考。不過今時今日只淨返一個途徑，就係香港考。話說一直以嚟大家都係响香港考，不過passing rate甚低，有board member報稱只有30-40%; 忽然間响十年前即係2012-2013年有個茂梨覺得香港考牌太多潛規則(潛規則包括Consultant出身最低限度有6-7年經驗先會比英國牌你；Contractor十年或以上；要有業界猛人加簽及圈子中人更容易合格等等)，所以仿效Institution of Civil Engineers ICE班人搭飛機過英國考，嗰陣英國CIBSE總部好錯愕以為佢填錯考試地址，點知佢原來真係香港讀書香港經驗但選擇英國考試，CIBSE英國總部負責人話，佢响度做咗十六年，第一次見有人係佢工作地方有CIBSE branch嘅情況下專登搭飛機飛半個地球去揀個陌生地方考試。此茂梨最後成功咗一戰成名，以四年工作經驗一舉攞到MCIBSE+CEng打破晒香港咁多年嚟嘅考牌潛規則，佢成功後亦好樂於向同行人分享飛英國考以繞過香港嗰套潛規則嘅經驗，結果之後幾年越嚟越多人跟呢條路攞到英國牌，隨住越嚟越多人咁做，香港branch發現咗再同英國CIBSE總部傾落閘，唔再比香港人飛英國考，佢地要求香港經驗嘅人一定要留返响香港考。最終CIBSE响2018年尾19年頭正式落閘，所有香港工作經驗嘅人不得再飛過英國考，只能留响香港原地考。

下個問題又嚟，何解要先攞英國牌，先至再經RRAs轉返香港牌？

最主要原因係，直接考香港牌的話，係要考即場考筆試。以HKIE(BSS)為例，除咗面試前要交Training & Experience Report 及 45 hours Record of Continuing Professional Development CPD外，仲要即場考英文寫Essay (Essay考啲乜詳見<考BS工程師牌最後一步>), 規則係基於你嘅經驗由考官出兩個題目，題目二揀一，兩個鐘就其中一個題目寫1600字。但有啲考官係完全唔跟遊戲規則，佢會自己天馬行空出題目，例如見你做消防就出一條IAQ一條MVAC system design；又或本來筆試兩個鐘，佢就自己改做一個鐘但又要求你照寫1600字。如果讀者有時間可以自己試下，對住報紙兩個鐘抄1600字都唔係一件容易嘅事。考英國牌的話就會冇咗呢個筆試，但RRAs轉返HKIE(BSS)嘅時候，你攞嘅MCIBSE+CEng唔符合香港潛規則(上面有講)，係好大機會捉你去"翻閹"，即係重新考過。有啲人好彩，只係被要求過啲Training & Experience Report + CPD + 面試；有啲人就會更唔好彩被要求考埋Essay.

如果你有MCIBSE+CEng而又滿足得晒上述 2.所講HKIE(BSS) or equivalent嘅條件，我淨係有呢個英國牌咪得？何解仲要RRAs攞埋香港牌MHKIE and R.P.E.?

攞到MHKIE嘅其中一個好處係，有MHKIE一年後, 係一定攞到R.P.E.; 但只有MCIBSE+CEng可唔可以直接繞過MHKIE去啦"工程師註冊管理局"攞R.P.E.? 答案係得嘅，只要你個MCIBSE+CEng滿一年就可以申請，不過都會經RRAs嘅相同翻閹機制，兼且極大可能會被要求考埋Essay. 攞MHKIE除咗穩攞R.P.E.呢個好處外，另一個好處係，擁有有效嘅MHKIE嘅會員卡(金卡)，係可以當入地盤必須嘅平安卡(綠卡)嚟用。見圖﹕

MHKIE除咗金卡之外，仲會有一張cert:

不過，綠卡三年續一次每次$150；而金卡就要年年續會費每次$2050咁上下。最大好處或者只係楂金卡入地盤係身份嘅象徵，同埋方便續R.P.E.。

而R.P.E.又有啲乜好處？就算你有齊MCIBSE+CEng, or MHKIE都好，係唔可以加簽任何香港嘅法律文件，只有R.P.E.先可以，簽得啲乜可以見本blog嘅另一篇<一文睇晒註冊專業工程師可簽署嘅法定文件>。R.P.E.(BSS)加簽得嘅文件覆蓋唔同政府部門嘅風火水電submission。仲有就係，由上述HKIE嘅金卡或cert係唔會知道你屬於HKIE邊個discipline, 要R.P.E.張cert及卡先睇到。

另外，只有成為R.P.E., 先夠資格做香港法庭嘅專家證人，不過斷估都冇乜機會用到。

下圖係R.P.E.張cert同card: