地盤抗暑血淚史 - 活用工程知識改善生活

十幾年前筆者考到工程師牌後離開舒適嘅辦工室落地盤搵真銀，發覺最難受嘅唔係被上家凌辱，而係戶外三十多度、又焗又濕嘅地盤。嗰種日日連續N個鐘大汗疊細汗嘅感覺係非筆墨可形容，出去行十分鐘已經成身又濕又臭，噴幾多止汗都冇用。既然揀得搵真銀呢條路，就要諗下點運用學過嘅工程知識解決問題。

當年市面上買到嘅風扇仔/芭蕉扇都甚為弱雞。筆者於是去淘寶執料，用普通電腦風扇+當年好罕有上到12V嘅尿袋改裝咗第一代嘅手提風扇，見下圖﹕

改完先發現，呢把扇只係比市面買到嘅稍強。筆者唔甘心，即著手改裝第二代嘅手提風扇，把扇係台達Delta 12cm x 12cm 嘅 AFC12 12038 server 專用扇，都係要12V電先推得郁﹕

雖然係十幾年前改裝嘅手提風扇，但風力及風量絕對吊打今日市面上買到嘅任何手提芭蕉扇或聲稱嘅暴力風扇。由於風力太大，我响舊電裝咗個12V直流調頻減弱個風量。即使烈日當空，呢把第二代改裝風扇係足夠一次吹幾個人。

後來筆者發覺行地盤隻手拎住舊嘢始終唔太方便，於是進行第三代改裝，再買一把server用嘅12V蝸牛扇及一把汽車專用加壓扇，改成可掛腰用，見下圖﹕



既可以手提，又可以掛腰，如下﹕


同樣，當年改裝嘅掛腰風扇(嗰陣市面仲未出類似產品)，已經比今日市面上買到嘅任何一把掛腰扇風力及風量強得多。原因係電池及風扇上都揼咗重本，電係用手機嗰種更輕薄嘅 Lithium polymer battery，風扇係行12V、3A~4.xA。

再後來，發覺掛腰風扇都唔係好用，最主要係啲風力太集中，唔能夠成個身體好平均咁散熱，所以呢兩把扇後來都被打入冷宮，除咗起BBQ爐或加炭嘅時候會用下。筆者跟住再著手改裝下一代，但今次唔係改裝手提風扇，而係將把風扇直接裝响件衫上面，咁就可以既解放雙手同時又可以全身均勻散熱。下圖係筆者將公司派嘅衫改裝嘅第一代嘅風扇衫(空調衣)﹕

筆者嘅針織工藝唔好，所以見到件衫啲開窿位好土炮，不過都叫比之前嘅版本好用。十幾年前著住呢件衫行地盤，引起好多工人羨慕，好多人走埋嚟話不問價都要買返件；又有人叫筆者唔好做地盤去申請專利。說實話，呢個諗法唔係筆者原創，冇記錯係2011年日本福島核災後，當地為咗慳電唔開冷氣，有個Sony工程師諗出嚟嘅橋。由於嗰陣呢個idea仲係好新，市面上冇相關產品賣，筆者惟有模仿佢個思路淘寶執料自己整返件。

但呢個版本嘅空調衣有兩個問題，首先係衣物質料做成容易漏風，件衫上有好多細窿令唔少風流失响唔該流失嘅地方，如果係集中由腋下下頸出風效果會好得多；其次係 風扇外圍冇個防護罩，有次筆者隻手指唔小心隊咗落去，即比葉片打到成手血。所以下一代嘅改裝又改進咗呢兩方面，用一件有防水功能嘅衫(冇細窿)及加返個防護罩，如下﹕


到後來，日本終於出咗件正常啲嘅商品風扇衫，筆者第一時間就買咗﹕

當年去日本網站買件衫+風扇+兩舊電+運費，花咗筆者二千大元，雖然日本呢件用嗰陣係方便咗，但風力及風量都係比唔上筆者改裝嗰件。冇計，佢地只用行max. 6V咁上下嘅有刷雞摩，以前有玩四驅車嘅朋友應該知係乜嚟。後來淘寶開始有零星類似嘅產品，但見到個design及spec.實在太不堪所以冇買。

過咗若干年後，直到2024年嘅今日，淘寶似乎開始有啲似樣啲嘅產品，其中一家報稱把風扇報稱係今年新品，用無刷30V；同時件衫嘅款式及設計似乎都進步咗唔少。筆者第一時間買咗﹕

呢件新嘢果然正好多，衫嘅設計款式好咗唔少，把風扇嘅風量勁過以前好多，惟一唔滿意地方係舊電有啲重。即使商家有送個裝舊電嘅穿皮帶款腰包，但個腰包係相當掗拃，要睇把扇風力調到幾大或電量幾多都相當之唔方便。然後筆者做咗以下嘅改裝﹕

買咗個皮帶扣+一支瑞士 Ergo 1309 AB膠。先用砂紙打花舊電及皮帶扣嘅背部，再用AB膠黐起嚟。測試過後明顯方便好用得多，建議商家考慮呢個設計。

或者有人會問，做乜你咁堅持風扇衫，唔試下其他技術線？如冰袋衣、便攜噴霧風扇、掛頸風扇、穿戴制冷片等等？原因好簡單，因為冇一個方案較風扇衫有效。先講

1. 冰袋衣、或任何冷水循環設備嘅衫，如圖﹕

呢個方案最大問題係，件衫好快就會被倒汗水整濕晒。你身體同件衫之間嘅空氣溫度及濕度都好高，就當37°C, 濕度90%嚟計，再上網搵個 psychrometric chart calculator 睇下﹕

即係任何表面溫度低過35°C嘅物件都會滴倒汗水。情況就有啲似你由雪櫃攞罐可樂出嚟放室外，等一、兩分鐘就會成罐嘢起水珠。試諗下，咁大舊低溫物件撻响你個身上面會發生乜事？筆者實測過，用一陣就同你游完水上岸差不多。

2. 便攜噴霧風扇

筆者前文<點解响香港用水冷風機 (Evaporative Cooling) 愚蠢至極？>已經詳盡解釋過，呢個方案壞處好多，但好處近乎零。增加嘅濕度既令人遠離thermal comfort zone；高濕度嘅戶外環境用唔單止會冇效果，甚至係反效果；

最嚴重係呢種產品好易散播致命嘅退伍軍人病毒。勞工處十幾年前都推介過地盤安裝呢類噴霧散熱風扇，但近幾年都唔敢再提，原因就係怕啲水嘅質量處理得唔好的話，就會大規模散播致命病毒，得不償失。

3. 掛頸風扇

比起上述兩個方案，呢個都算係相對有用少少嘅產品。但問題係，淨係吹到條頸同塊面，吹唔到個身，兼且風力甚弱；而可見將來亦唔見得太大可能增加風力，因為掛頸式係要考慮到舊電重量、風扇功率及嘈音等因素。今時今日呢種產品對於夏天行地盤嚟講，完全係杯水車薪。

4. 穿戴制冷片

個原理大概係一片制冷片貼住你嘅肉，再有把細風扇將熱風向上吹帶走。乜唔係話制冷片嚟？點解仲要散熱風？咁就要睇返 First law of thermodynamics, 再簡單啲講，所謂嘅冷氣，大概就係一台比電後，一頭出凍風，另一頭嘔熱風嘅機器。

你話呢舊嘢冇用咩？又唔係完全冇；你話有用咩，就睇你點睇，個感覺大概就係攞住包雪櫃攞出嚟嘅紙包飲品底部貼住你後頸嘅感覺。個人認為，以香港嘅夏天嚟講，即使唔係做地盤，只係室外行下街，呢個產品最多只係聊勝於無。

其實有冇一啲既係便攜，又可以出到舒適冷風嘅裝置？其中一樣就係用制冷片。多年前有幾個中學生用制冷片砌咗下面嘅所謂便攜冷氣機出嚟，被傳媒講成係偉大發明 [1]﹕


個人認為，比中學生們動手砌下嘢攞獎開心下係OK嘅；但任何一個稍為有工程知識嘅行內人真係信呢舊嘢有實際用途的話...😀

其實只要知道幾項基礎嘅原理，唔需要真係做件嘢出嚟已經預測到work or not。首先可睇下制冷片嘅 Coefficient of performance CoP，記得當年買到最好嘅都唔超過1，與此同時粒嘢耗電量好高，惟一講得出嘅優勢就係呢個方案部件比較少；另外制冷片唔係就咁駁電就可以變凍，前後都要加把風扇出冷風及散熱，冇良好散熱粒嘢十零秒就燒，而前後兩把風扇都係要用電；另外呢舊嘢係面對開放嘅環境，出風個位溫度再低都冇用，要令成個人感覺到涼快先有用。舉個可能唔太恰當嘅比喻，零下-30°C嘅冰天雪地，你啪著個打火機，係唔會幫到你取暖；同樣道理，夏天33~35°C下嘅開放環境，攞住呢舊便攜冷氣機係唔會令你覺得涼快。或者有人會問，有啲小型雪櫃，用呢啲制冷片係好有效喎，點解去到手提冷氣就變得完全冇用？原因好簡單，因為雪櫃係一個有保溫嘅閉合環境，制造出嚟嘅冷量容易保存起嚟，唔容易散失於大氣中。

仲有一個方法係既可以手提，亦可以吹到舒適嘅冷風出嚟，就係用小型 cooling coil + 冰水循環，以下係筆者做過嘅實驗，原理圖都放埋出嚟﹕

筆者當年計過數，用冰+水+水泵+cooling coil吹出嚟嘅冷風量，以及成個裝置嘅大細、重量、成本等，係遠好過用上述中學生嘅電池+制冷片方案。但呢個實驗只能夠話係半成功﹕成功地吹幾度嘅冷風出嚟，風力亦甚大，個感覺就好似你企响家用冷氣機前面，前大老細見證過(呢位大老細成日搵我做埋啲奇怪研究，例如點先可以响樓板底面鐵之間行三層conceal conduit之餘又唔影響石矢cover，以後有機會再講)；失敗嘅係便攜方面仲有好多改善空間。有樣嘢幾可惜，當年冇為呢舊半成功嘅作品影返張全景靚相；而舊嘢亦冇再進行下一代優化，最終被遺棄响舊地盤冇攞返走。

講到底，風扇衫先係香港暑熱天嘅最優解，雖然著起嚟好似米芝蓮車胎人咁有啲奇怪；

另外著呢件衫仲有個技巧，就係裡面唔好著底衫，風扇谷入去嘅空氣可以直接同皮膚表面汗水接觸加速汗水揮發，咁先可以達到更好嘅散熱效果。

講起呢個散熱原理，筆者又諗返起當年上北角水記嘅一單有趣往事。話說嗰陣我做大判，同埋機電顧問、Sub con水喉代表、Sub con水喉匠一齊上去同阿sir傾批圖。大家坐低後，估唔到水記阿sir劈頭一句﹕「點解你地個Cooling Tower要用咁多水？﹗我地供水已經好緊張；仲有呀，呢啲係特許供水嚟，我地係有權唔批比你﹗你地解釋比我聽，點解Cooling Tower要用咁多水﹗解唔到就唔好怪我reject你地嘅申請﹗」嗰一下，顧問、sub con水喉匠等面面相覷你眼望我眼唔知點答。呢個時候最唔關事嘅大判代表，即係我，本來想食花生，但諗咗下都係算，挺身而出幫佢地解圍﹕「阿sir，係咁嘅，cooling tower散熱其實係幫成個社會慳到好多電，呢啲電用返嚟做海水淡化都有著數。至於cooling tower點散熱，我要由一滴水响個 cooling tower 入面點降溫開始講起...[2]」

一開始仲以為阿sir係玩嘢有心刁難，所以將當年大學學過嘅嘢以長篇廢話方式講返次出嚟悶下佢，等佢知難而退。點知佢係好認真聽，好認真學，仲要不斷問啲有水平嘅問題，搞到我都有啲唔好意思。咁啱我又諗起個袋有把風扇及紅外線溫度計，然後我話﹕「阿sir不如咁，我做個小實驗比你睇或者會容易明白啲...」點知阿sir一句話﹕「Stop!」然後衝咗出房。我心諗，pk喇今次，係唔係啱啱講錯啲乜。點知原來阿sir係出去叫咗十幾人入嚟一齊聽。我搵張紙濕啲水放枱面，先比佢睇下原本個溫度，然後再用風扇吹張紙，張紙迅間降溫；再攞一張冇濕嘅紙做返以上嘅動作，係冇任何降溫效果。最終我地個cooling tower用水申請順利獲批。

仲有一點值得留意，風扇衫嘅散熱方式係不同於便攜噴霧風扇，前者係加快水份，亦即係汗液揮發，以達到降溫效果；後者係透過加水增加空氣濕度以換取極少嘅顯熱降溫，舒適感而言風扇衫係好得多。

另外，筆者亦嘗試過改裝安全帽，呢個係第一代版本﹕


呢個版本做得唔好，因為要鑽個窿破壞咗安全帽嘅結構。後尾筆者做咗個第二代新版本﹕

兩把小型蝸牛扇裝後面，直入上吹，散熱得嚟唔會索到頭髮，又唔會破壞到安全帽嘅結構；由AA筆芯電池盒改為行聚合物鋰電，充電、重量、續航等表現更加好；另外，前面加盞可拆嘅燈，方便去啲連臨時燈都冇嘅地方；再畫到頂帽係可愛少女style，如果有人想偷帽，應該偷完都敢戴上個頭度。

或者有人會問，做乜唔裝塊太陽能版上安全帽度？咁咪連供電都慳返？用過小太陽能板嘅人就會明白，當塊板連接上啲細功率嘅摩打仔後，要烈日當空先勉強行得郁，個天陰少少把風扇連x毛都吹唔起，更何況BS從業員經常要入樓籠。

記得香港某名嘴講過﹕攞住把巴蕉扇怕熱嘅年輕人係廢青(所以响香港，芭蕉扇亦被稱為廢青扇)。筆者實在難以理解，善用工具或人類發明改善生活有啲乜唔妥嘅地方？難道要返去火都唔用，茹毛飲血嘅生活先配得上做有為年青人？人類文明能夠走到今時今日，就係因為我地識得不斷運用工程知識改善生活，亦係"Engineering"一字嘅定義﹕"Engineering is the practice of using natural science, mathematics, and the engineering design process to solve technical problems, increase efficiency and productivity, and improve systems. [3] 工程學是運用自然科學、數學和工程設計過程來解決技術問題、提高效率和生產力、改善系統的實踐。"

[1]: unwire hk - 專訪：窮苦資優學生製作迷你冷氣機：「劏房都用得！」

[2]: 有趣趣嘅朋友可以睇下 HVAC Water Chillers and Cooling Towers Fundamentals, Application and Operation by Herbert W. Stanford III

[3]: Wikipedia: Engineering - https://en.wikipedia.org/wiki/Engineering