[BS] 淺談中國內地嘅BS工程師考牌制度及考試

可先參考前文<香港考BS工程師第二步>。中國BS工程師考牌制度同香港最大唔同嘅地方係，香港係行英式面試"信人"制度；中國係行冇面試純筆試，即係信類似香港公開考試嘅制度，兩種制度嘅優劣前文已分析過唔重複。

中國嘅BS工程師分得好細，佢地冇一個大項叫屋宇裝備工程師，下面大概做一個工作上嘅橫向對比，建議同時參考<何謂香港BS工程師牌>一文﹕

	香港	中國
MVAC	R.P.E.(BSS/MCL)	註冊公用設備工程師(暖通工程)
EL	R.P.E.(BSS/MCL/ELL)	註冊電氣工程師
FS	R.P.E.(BSS/MCL/FRE)	一級註冊消防工程師
PD	R.P.E.(BSS/MCL)	註冊公用設備工程師(給水排水)
Gas	R.P.E. (BSS/MCL/GAS)	註冊公用設備工程師(動力)

BSS=Buidling Services Discipline; MCL=Mechanical Discipline; ELL=Electrical Discipline; FRE=Fire Discipline; GAS=Gas Discipline;

而跟據<廣東省住房和城鄉建設廳關於香港工程建設諮詢企業和專業人仕在粵澳大灣區內地城市開業執業試點實管理暫行辦法>，暫時只有以下嘅香港BS專業係可以直接被內地承認，有興趣大灣區發展嘅朋友可以留意一下﹕

香港	中國
R.P.E.(BSS)	註冊公用設備工程師(暖通工程)
	註冊公用設備工程師(給水排水)
R.P.E.(ELL)	註冊電氣工程師

回顧一下香港BS工程師同中國BS工程師嘅成長路徑，見下表﹕

年齡	香港(舊制/新制)	中國
11	中一	初一
12	中二	初二
13	中三	初三
14	中四	高一
15	中五 [會考] / 中五	高二
16	中六 / DSE	高三 [高考]
17	中七 [高考] / BEng Yr1	本科一年
18	BEng Yr1 / BEng Yr2	本科二年
19	BEng Yr2 / BEng Yr3	本科三年
20	BEng Yr3 / BEng Yr4	本科四年 [考研]
21	MSc (part time) + 工作第一年 (Scheme A )	碩士一年(全日制)
22	MSc (part time) + 工作第二年 (Scheme A )	碩士二年(全日制)
23	工作第三年	碩士三年(全日制)
24	工作第四年 [MCIBSE+CEng]	工作第一年
25		工作第二年
26		工作第三年
27		工作第四年
28		工作第五年
29		工作第六年[註冊公用設備工程師]

假設﹕

香港考生係大學畢業後有人會選讀一年full time 嘅MEng, 亦有人MSc攤開三年part time完成，呢個例子以較普遍嘅兩年part time讀完。再以2+2方式最快速度攞到牌。
中國考生係係本科後再讀三年全日制嘅碩士(中國嘅碩士係要過"考研"先有得讀，唔係香港咁有錢就讀到；同埋絕多數都係三年全日制，相比起香港真係幸褔得多。) 之後碩士後加六年相關經驗先有資格參加全國註冊公用設備工程師考試。

就以中國註冊公用設備工程師(暖通工程)嚟做例子，佢地嘅考試係直接用筆試唔需要面試，先要過咗八個鐘嘅基礎試，再考十二個鐘嘅專業試。佢地嘅筆試係考啲乜內容？

八個鐘基礎試的話，你可以睇成係一次過將高一至碩士三年級呢十年時間讀過嘅數學、物理、化學、流體力學、工程力學等等全部考試。比啲試題例子大家睇下﹕

留意，上面幾題只係240題其中嘅3題，同埋過到呢240都只係叫做過咗頭八個鐘嘅基礎試。過咗呢個基礎試，先有資格進入下一關嘅專業試。

專業試十二個鐘又考啲乜？就會返返去我地平日見慣嘅內容，如Water side, air side, 當然仲有好多heating, ice storage等等，共十二個鐘分兩日考，包括MC, Essay, 以暖通工程為例，抽其中兩題﹕

對一個香港讀工程嘅考生嚟講，個試絕對可以用難到PK嚟形容。除非你係超級學霸，否則絕對唔建議去考呢個試，因為唔係同一個起跑點同人地競爭；況且而家你只要楂R.P.E.(BSS/ELL)的話中國內地係承認，見上表。

筆者十年前返過廣州考註冊公冊設備工程師(暖通空調)呢個試。入到試場查身份證明文件，我攞張香港身份證出嚟，個檢查員睇到呆咗係咁問我呢張乜嘢嚟，我話係香港居民身份參加，佢猶疑咗好耐，跟住攞張證去到處問人，最後佢地都OK可以入去考，應該平時都冇乜香港人會咁得閒專登返上去考呢個試。

入到考室先發現原來香港真係好好好幸褔。正值好似係七、八月炎炎夏日，响一個冷氣都冇嘅班房考試，吊頂風扇都開得好細，應該係驚吹郁枱面啲試題，一坐就一日八個鐘，上畫四個下畫四個，坐唔夠十五分鐘就大汗疊細汗。嗰陣見個個人枱面放兩大支水終於知乜事，原來大陸工程師筆試唔單係鬥腦袋，仲要鬥體力，好似跑馬拉松咁，係要中途補充水份同電解質；張枱係幾十年前嗰好多穿窿嘅木造，支筆寫嘢要輕輕地咁寫先唔會篤穿張紙。

至於呢個試嘅合格率有官方數字，坊間估計大概係5-15%；攞到個專業資格後月薪大概有35000-50000人仔。我2008年認識一個北京嘅注冊暖通工程師嗰陣有50000月薪。個人認為香港做BSE各方面待遇比起內地可以算係相當唔錯。