[BS] 問﹕响香港考BS工程師牌，第二步要做啲乜？

 答﹕

先睇上一篇文章<响香港考工程師牌，第一步要點做？>。

都係以攞MCIBSE+CEng做例子。响CIBSE官網嘅一份Application Guidance of Member (MCIBSE) 有相當清楚嘅介紹要交啲乜﹕

包括﹕Employment Details, Development Action Plan, Engineering Practice Report, Demonstration of Competences Form (completed by your sponsor), Organisation Chart, Relevant Qualification Certificates.

除咗Demonstration of Competences Form (completed by your sponsor) 及 Engineering Practice Report比較難搞外，其餘各項跟指引做就得，易過平日返工寫嘅薯仔文。

先講Demonstration of Competences Form (completed by your sponsor), 首先你要搵個有Chartered Engineer 或建築業界內嘅專業人仕，如MHKIA, 去sponsor你去申請。呢個sponsor除咗要證明你嘅學歷、工作經驗等文件係真實外，sponsor仲要寫五段文字(5個A-E嘅compentence criteria framework)說明你係夠料成為MCIBSE+CEng。至於呢5個compentence係啲乜嚟，遲啲會再開新topic討論。

再講Engineering Practice Report, 寫呢份報告應該係考英國牌最核心亦係難度最大嘅部份，你係要跟住五個compentence criteria A, B, C, D, E (其實仲有細分項，分別係A1, A2, B1, B2, B3....E4, E5)去寫，Application Guidance of Member (MCIBSE) 都有相關指引，之後會開個topic詳細分析。好多人就係唔知呢份嘢點寫所以對考牌卻步，而BS業界普遍而言都係對呢啲報告嘅範文，亦即係所謂嘅sources"疏屎"收收埋埋唔願分享。其實冇必要因此卻步或收埋，因為CIBSE官網已經放咗一堆Engineering Practice Report Sample出嚟任人參考，見 "Home" > "Membership" > "Help for Applicants" > "Sample Reports and Statements" > "MCIBSE" > "MCIBSE Sample 1".

交齊上述資料後，CIBSE嗰邊會有專業人仕審閱你交嘅嘢，如果冇大問題，佢地會安排你某個日子面試，一般而言會有兩個考官以英文對你進行面試，大概係45分鐘至一個鐘，面試會問啲乜及趣聞會再另開主題講。兩個考官入面只需要有其中一個評你合格，你就正式攞到英國工程師牌。

你又可能會問，呢個試咪幾乎完全係"人治"嘅考試？如果有人請槍做文件，再搵到人做sponsor, 再識得其中一個考官，咁個牌咪手到拿來？

的確如此。

英國採用呢套制度係有利有弊。如果你對英國歷史及普通法等制度有背景知識會較容易理解。佢地嘅條文唔會寫到好清晰，只會寫個大方向，然係選擇"信人"，靠專業人仕嘅professional judgement去解釋呢啲原則。佢地相信專業人士嘅誠信同不偏不椅，相信佢地對自己專業資格之尊重及榮耀。 如果你對香港嘅司法系統有一定認識的話相信對呢種英式制度唔會覺得陌生；而佢地對評審專業人仕嘅考試亦係普遍採用呢套制度。只要你交齊資料，幫你加簽嘅專業人仕sponsor證明咗你提交嘅資料係真實，而兩個同樣係專業人仕嘅考官都認為你夠料，你就可以過關。

呢種做法最大好處係靈活、可塑性高，節省成本。試諗下，BS Engineering 嘅知識領域既專且闊，如果要CIBSE每年要制定兩份新嘅筆試試卷，每次都要更新題目唔重覆同時要做足保密措施，工作量可想而知；況且統一試卷的話一個Lift Engineer有冇需要熟悉MVAC 或 Plumbing & Drainage design又係一個問題；如果分開範數考又冇咗Building Services嘅一致性，因有唔少人係同時跟兩個或以上嘅範疇，又或者做fitration plant/medical gas等相對冷門嘅BS範數又係唔係要獨立成科？仲有BS嘅系統同技術日新月異，一啲較新嘅BS系統如Combined Heat & Cooling Power CCHP (or Trigeneration) 等，又應唔應該即時納入筆試項目？如果冇個即時更新嘅機制，成個BS業界對新技術新知識又係唔係好易脫節? 

英國用compentence criteria framework嘅考試模式，只需要制定幾條大準則，考官就可以根據既定嘅準則去判斷考生參與過嘅項目同能力，即使考官同考生做嘅BS嘢係唔同範疇嘅，甚至面對一啲考生參與過，但考官都唔熟悉嘅新知識新技術，都有更好嘅兼容性；同時節省大量人力物力出試題，考生可以少花好多時間去刷啲可能一世都用唔到嘅題目。但當然，有利就有弊，最大問題係唔同考官，對"夠料"嘅定義係冇一個相對客觀嘅標準。

呢套英式制度要運行𣈱順，大前提係"人係信得過"。但可惜套制度去到香港，就有啲橘越淮為枳變咗質嘅感覺。由於香港成個BS市場相對較細，以致主持考試嘅考官同考生數量唔多，權力核心坐board考官嚟嚟去去都係嗰個小圈子。"夠料"與否往往淪為睇下邊個搵到權力核心嘅人做sponsor, 面試前再搵sponsor同考官私底下打個招呼後，邊個就容易成功。所以响香港，考到BS工程師牌嘅唔一定叻；考唔到嘅都唔一定冇料，可能只係佢唔好彩識唔到人或遇到killer考官。

講完英國嘅制度，又講下大陸法嘅地方如中國。佢地係採取另一套截然不同嘅制度，選擇信清晰條文，一個畫好框框嘅制度而唔係選擇信人，就以考中國註冊暖通工程師咁，佢地考工程師牌係唔需要經過專業人仕嘅面試或sponsor，但要直接考共廿小時兼合格率極低嘅筆試，見<中國BS工程師考試制度>；筆試亦都可以令考生嘅基礎科學及工程知識更牢固扎實；此外佢地出題嘅成本會因為龐大嘅人口數量而大大降低，舉個唔太恰當嘅比喻，英國出一次題，可能只係五百人用；但中國出一次題，就可能係一萬人用到，平攤咁大基數嘅考生成本低得多。

以上兩種制度我只做事實陳述，熟優熟劣，留返比各位讀者判斷。