BSE Sharing: 考牌新捷徑﹕繞路中國內地攞MHKIE

先講結論，呢條路行唔行得通？答案係﹕理論上可行，但實際上可能仲難過你直接報考MHKIE。好多網民，只要新聞標題見到「大灣區」、「HKIE」、「互認」等字眼就彈起嚟，但似乎就唔太多人會深入分析發生緊乜事。事實上，到目前為止，MHKIE同中國內地工程師學會已落地嘅互認機制只有頭兩項，見下表﹕


		合作備忘錄	互認意向書	已簽互認框架協議	已實行互認協議
1	中國工程師聯合體				🗸
2	廣東省電機工程學會				🗸
3	廣東省工程師學會			🗸
4	廣東省土木建築學會		🗸
5	廣東省岩土力學與工程學會		🗸
6	廣東省科學技術協會	🗸
7	廣東省機械工程學會	🗸

相關新聞可見附註[1]

先睇2.廣東省電機工程學會，香港人可唔可以經呢條路攞MHKIE(ELL)? 答案係直接否定，前文<經RRA獲得MHKIE: 一系列不為人知的途徑>已略略提及過。詳情可以到HKIE網站下載文件"M14343”，再睇睇Note AB個Appendix，淨係"只接受內地永久居民報名"一項，已封死香港人走呢條路。
雖然封死咗，我地亦可以繼續八卦一下，睇睇內地同胞經呢條路攞MHKIE(ELL)仲有啲乜條款。
首先佢地要係'廣東省電氣工程師'，呢個又係點先攞到？可以响呢度睇到份長到無倫嘅簡體字廣東省人民政府官方文件。冇興趣睇咁長篇嘅文字亦冇所謂，筆者做個撮要。
簡單嚟講就係大學讀完電力相關畢業後，以技術員嘅身份做兩年+出research paper後，晋升助理電力工程師，再做多四年+出research paper, 就可以晋升為電力工程師。當然呢個時間，仲要加入互認嘅"2.廣東省電機工程學會"，加入條件要經歷類似ECUK嗰種Competence Base考核，之後會再詳細講。不過呢啲都係小菜一碟，最大嘅障礙係，佢地需要IELTS考到6.5分，對高考後冇乜機會再接觸英文嘅內地工程師而言係一個相當大嘅挑戰；即使乎合上述條件，佢地必須再要接受HKIE ELL班考官以英文面試一個鐘及考最攞命嘅即場英文寫Essay。

可見得，HKIE唔止對英國等英聯邦工程師學會嘅Chartered Engineer RRA轉會玩「翻閹」[2]，對內地同胞都係一視同仁。

再睇1.中國工程師聯合體，香港人能唔能夠經呢條路攞MHKIE? 筆者以下就試下以第一人稱視覺睇下行呢條路可以點攞。

第一步﹕都係睇下HKIE嘅M14343 Note AC講啲乜先。咦？咁著數，攞到1.中國工程師聯合體嘅"資深工程會員"，就可以直接攞FHKIE喎。跟住睇下BS呢啲做building風火水電工程師可以攞邊類先，似乎”建築工程類"及"電氣工程類"都對應得上，筆者暫時只講前者以令讀者便於理解。

第二步﹕睇下點先可以成為1.中國工程師聯合體嘅"資深工程會員"。打開其官網，發覺都好似唔係好難喎，只需要 i. 華盛頓協議下認可嘅學位；ii. 十年經驗，當中有五年係GFA 20,000ft2以上嘅工程。普遍而言，香港做工程嘅朋友都好易滿足到；iii. 類似考CIBSE/IMechE/IET CEng或HKIE (BSS/MCL/ELL)，以Competence Base形式[3]寫工程報告(簡體中文)，然後參加面試、筆試，過咗後就搞掂。

第三步﹕直接開個賬號註冊，需注意嘅係，佢地只接受中國內地嘅11位電話號碼，同埋呢步記得記得填寫真名，填錯咗係返唔到轉頭，呢個名會直接用响證書上；此外，填寫身份證號、政治面貌、工作單位等，筆者親身測試過，係冇排除香港人報名。

第四步﹕睇下可以註冊邊個學會嘅"資深工程會員"。以做冷氣為例，咁多項入面，只有兩項可選，分別係中國制冷學會及中國建築學會，因為只有呢兩項係"建築工程類"相關。見圖﹕

講咁耐，唔記得介紹一下1.中國工程師聯合體係一個點樣嘅組織。佢嘅角色大概就係英國Engineering Council，係N個工程學會嘅聯盟，再聯統一頒發專業/資深會員資格。

第五步﹕提交學歷、工作證明、工程報告等資料，報考過CIBSE/IMechE/IET CEng嘅朋友應該唔會太陌生。最大唔同嘅地方係要用簡體中文字寫，同埋堆Competence Criteria同Engineering Council有少少唔同，可參考附註[3]。另外，中國內地係相對強調要發表research paper, 香港做工程嘅朋友對呢方面可能會較為陌生。

第六步﹕佢地審完你提交嘅資料後，決定邀唔邀請你去參加面試及筆試。跟據其總部及學會核心人物位置推斷，相當可能要買張機票飛北京參加。成功攞到1.中國工程師聯合體嘅"資深工程會員"證書後，就要踏上最後亦係最艱難嘅一步。

最後一步﹕跟據HKIE form M14343 Note AC所講，即使你攞到1.中國工程師聯合體嘅"資深工程會員"證書，都要完整地走一次報名FHKIE嘅流程。呢步嘅難度係乜？首先你要集齊四個簽名(兩個FHKIE+兩個MHKIE，其中兩個要係你報嘅discipline)；再要O Chart證明自己係公司高層(簡單而言，政府的話要Senior Engineer或以上；私人市上的話要Associate Director / Department Head以上)；仲要上一堆證明你對HKIE嘅貢獻等等，呢點係最難量化，試問一個中國內地嘅工程師，可以點對HKIE貢獻？即使最後交得晒，亦唔等於HKIE會比個FHKIE你。HKIE响”M2 Routes to Fellowship”呢份form嘅Route FS4寫得好清楚，佢地保留最終權力決定比定唔比你。亦即是，就算各位用呢條路奇襲成功，HKIE都可以唔比任何理由嘅情況下拒絕你FHKIE嘅申請。

睇到呢度，大家仲覺唔覺得可以用呢條路攞FHKIE?

最後再睇下，全國有幾多個1.中國工程師聯合體嘅"資深工程會員"能夠用呢條路攞FHKIE嘅資格？我地又可以去"1.中國工程師聯合體"嘅網站睇下，以"建築工程類"嚟講，暫時只有90人符合資格。

如果呢篇文章今年有超過一萬次點擊(筆者其他文章都有數萬點擊率)，筆者就會身體力行吃屎給大家看，親身走一次上述嘅流程，睇下會發生乜事，然後再向大家報導實況；當然，淨係證明自己係公司高層一項，筆者呢啲small potato已經冇可能過到HKIE嘅Fellow審查。

至於已簽互認框架協議嘅3.廣東省工程師學會將來又會係點？由於佢地連網站都未搭建好，相關資料欠奉，筆者難以作太多分析。不過，筆者推測，3.廣東省工程師學會最終會以類似Engineering Council嘅形式(地區性嘅縮小版1.中國工程師聯合體)，與4.~7.等一眾廣東地區嘅工程相關學會綑縛後，再與HKIE各Discipline互認。

另外，要注意嘅係，上述嘅1.中國工程師聯合體，同之前筆者所講嘅註冊公用設備工程師(暖通/給排水)考試，係兩回事嚟。前者係非官方發起嘅工程師專業資格認證制度，係用嚟同國際嘅專業工程師考牌認證制度接軌，幫助內地工程師走出去用(外循環)；後者係國家級別舉辦嘅考試嚟、比內地工程師留國內發展用(內循環)。

[1]: 2021年12月08日香港工程師學會與內地工程專業團體建立合作及資格互認關係;
2023年05月21日第二屆大灣區工程師論壇「工程創新灣通世界」;
2023年11月15日香港工程師學會與廣東省工程師學會簽訂互認框架協議　拓展工程師發展機遇

[2]: 翻閹 - 說到一個小故事﹕為甚麼考成完英國學會工程師學會工程師牌的考試後，又被HKIE邀請進行另一場考試，會被稱為「翻閹」？其實是有典故的﹕

過去的養雞人會閹割公雞以使其生長得更好。但總有一些漏網之魚閹割得不乾淨，需要進行二次閹割。這個二次閹割俗稱為「翻閹」。

有些考生可能會覺得，無論從規模、制度或聲譽來看，英國工程師學會都比HKIE更勝一籌。明明已經成功通過了英國的考試（第一次受虐被閹割），那麼為什麼在RRA的時候還要再經歷一次HKIE的考試？（二次受虐）；與此同時，再一次interview「翻in」與「翻閹」廣東話發音相近，所以久而久之行內形成「翻閹」一說。