“聽人講，考牌要有master先得架”
“聽人講，IMechE好易考喎”
“聽人講，考呢個學會就要搵呢個學會既人同你簽名”
“聽人講，行scheme 無用喎”
“聽人講，咁做就岩例架啦”
“聽人講? 你究竟聽邊個講呀?”
在工程界工作，偶爾會聽到人們用“聽人講”這個口頭禪。這種說法在剛入行的工程師中很常見。在一般社交場合中這樣說沒有問題，但在工作和考取執照時，這其實是一種不良習慣。
口耳相傳的資訊容易出現偏差。當信息經過多次傳遞後，往往變得模糊甚至錯誤。如果不進行事實核查，就可能被誤導，從而做出錯誤的判斷。
許多工程決策基於一系列計算、考量和法規要求。面對上司和客戶時，應該明確說出自己決策的依據。以道聽途說的資訊支持決定不僅不恰當，還會影響他們對你的觀感。
許多人向我詢問考牌的相關事宜，常用道聽途說的資訊來討論。雖然我樂於回答各種問題，但心中不免疑惑，這些問題的答案其實很容易在網上找到。我發現，許多有意考牌的人並未認真查看考牌要求，尤其是官方資訊。
考牌有很多規則而且亦有很多途徑。每個人的學歷和職業發展各有不同，最適合自己的考牌路線需要自己收集資料和研究來判斷。如果你的考牌資訊僅來自他人口耳相傳，且未仔細查證來源和確認真實性，那麼你的能力其實未達到HKIE Competence 3 / ECUK Competence B2 / EA Competence 14的要求，即未滿足考牌的條件。
筆者: L君
2024年9月16日星期一
經常將“聽人講”掛在嘴邊的人，是無資格考牌
2024年9月11日星期三
「講feel」港女 vs 「講feel」考官
話說前排筆者受某朋友所托，幫佢嘅女性朋友A搵另一半。作為一個負責任嘅介紹人，當然要問清楚雙方想要啲乜。 筆者﹕你對未來嘅另一半有乜期待？例如性格、外貌、職業等。 女A﹕冇㗎，我冇所謂㗎，有feel就得，最緊要有feel。你講嗰啲性格、外貌、職業都唔重要。 筆者﹕我有個中學畢業從事保險業嘅朋友，你會唔會有興趣見下？ 女A﹕咁又唔得，我master畢業，對方起碼係大學畢業啦；另外，我最討厭保險佬，佢地就係一班著住西裝嘅騙子。 筆者﹕我有個工程師朋友，master畢業，有香港註冊專業工程師資格，四十歲，上市公司做緊管理層，人工過十萬，係香港最top嗰3.5%[1]。佢外貌上有少少抽象，不過佢好好人嘅。 女A﹕下？四十歲咁老？點抽象法？有冇樣睇下，我係外貌協會嚟。另外，我對做工程呢行嘅都麻麻地，咪即係地盤佬。 [呢個時候筆者攞咗個工程師朋友張相比佢睇，女A睇完後...] 女A﹕嘩，呢個個樣好唔掂喎，我完全接受唔到。 筆者﹕(好鄭重咁同女A講) 你之前唔係話只要有feel就得咩？原來所謂嘅「feel」之上係有咁多硬性條件嘅，例如學歷、職業、外貌等硬性條件要求。我認為你要諗清楚你想要啲乜先，否則我好難幫到你。 ----------------------------------------------------------------------------- 話說筆者前排做某工程師學會嘅考官，遇到上述類似嘅情況。 兩個考官面試完考生後，會叫個考生先離開，然後討論對個考生嘅睇法。以前舊制係兩個考官可以各自修行，一個pass一個fail都得；但新制係要兩個考官斟到個一致性嘅結論。呢個時候考官X先問筆者... 考官X﹕你覺得呢個考生似唔似一個Chartered Engineer? 筆者﹕何謂似？何謂唔似？可以唔以講得具體啲？你心目中把尺係點？ 考官X﹕我講feel嘅，我就覺得佢唔似。 筆者﹕你認為佢點唔似法？ 考官X﹕佢某條題目(基於考生私隱從略)答唔到我想要嘅答案囉。 筆者﹕咁你期待佢嘅答案係點？ 考官X﹕你而家考返我呀？﹗總之我覺得佢答我唔到啦，即使我都唔知我想佢答啲乜。佢就係答唔到我想佢答嘅嘢﹗我會肥佢Competence A & B。 筆者﹕跟據考官指引，個考生答漏嘢，有可能係佢一時緊張漏章，考官係有責任引導考生去答；如果係答錯嘢，我係會直接指出，並提醒考生呢個位你答錯要溫返，但就唔會用啲自己都講唔清楚嘅理由去肥個考生。另外你可唔可以講講你對Competence A & B嘅理解及肥佢嘅理由？對我嚟講，我唔會用講feel嚟決定個考生pass or fail，而係跟返官方出版嘅考官指引。 先睇返 Competence A Technology講啲乜 - ”Questions about technical updating, recent developments, choice of systems and components, examples of innovative use of technologies in specific project” [2]; 另外睇返官網，考生係要成為專業會員，係要”Develop solutions using new & existing technologies, instead of only Maintain & Manage applications of current & developing technology”。 再睇 Competence B Problem solving講啲乜 - "Questions about development of client brief, awareness of range of factors affecting choice of engineering solutions, use of design tools e.g. computer modelling”[3]。同樣，睇返官網，考生要”Solve problems in New technologies and Develop NEW Analytical Techniques, instead of Solve problems in developed technologies using well proven analytical techniques” 我見到考生嘅做過嘅嘢及面試中嘅回答，例如某某某例子(基於考生私隱從略)，係同佢Engineering Practice Report所描述嘅一致，並滿足到 Competence A “Develop solutions” & Competence B “Develop New Analytical Techniques”嘅要求。雖然佢有一題半題係答錯，但指引冇講過答錯呢少少係可以構成fail佢嘅理由。 另外，跟據考官指引及Competence Base考試嘅精神，我地係應該以 What / When / Where / Why / How 形式問返考生 Engineering Practice Report入面寫嘅嘢做過嘅嘢，睇下個考生係唔係真係掌握到A, B, C, D, E 五項Competence所提及嘅一整套Chartered Engineer應有嘅思考及能力模式。我地係唔應該漫無邊際東拉西扯咁問考生問題，考官指引就從來冇講過考生需要掌握得晒Building Services風火水電全方位嘅知識。你有冇睇過UK官方嘅公開Sample? 齋做Lift or BMU嘅一樣可以攞到Chartered Engineer，唔見得佢地係識晒所有BS嘢。 考官X﹕我唔認同你囉，我覺得我有權問任何問題，BS不嬲係包風火水電所有嘢㗎啦。 筆者﹕你想點肥佢？考官指引講到明，肥人係要寫到個好清楚嘅理由喎。 考官X﹕我唔認同你囉，我會求其一句含糊其辭寫佢肥Competence A & B就算，寫咁詳細容易被人捉痛腳。 筆者﹕唔好意思，我完全唔能夠認同你嗰堆「覺得」「講feel」「唔似」「含糊其辭肥考生以避免被捉痛腳」等言論。跟據考官指引，真係冇提及過你可以問Engineering Practice Report, Competence以外嘅嘢，似乎你未搞清楚Competence Base考試嘅精神，我之前已經講過，唔再重複。如果每個考官都自由發揮唔跟官方出版嘅考官指引，咁呢個Competence Based嘅制度仲有冇必要存在？ 另外，「求其抽一範考生未做過嘅嘢嚟問死個考生」呢個邏輯成立的話，豈不是意味住任何人，甚至包括過往BS底嘅工程師學會會長，都可以被考官用呢個理由嚟判定佢冇資格做Chartered Engineer？畢竟我地個市場上冇人係可以窮盡所有BS知識。將心比己，如果你係坐考生個位，被考官用一啲漫無邊際東拉西扯嘅問題肥你，你會有乜感想？如果你係個考生，收到個句含糊其辭嘅comment，你下次可以點改進，點再備戰？ 老實講，我地做呢啲工程師面試考官都係冇錢收嘅義工嚟，我用呢個時間跑freelance起碼幾千蚊落袋。我地坐得考官呢個位，無非都係為咗個業界嘅持續發展，選擇得做嘅就有責任去認真去做。 後記﹕ 筆者睇緊 Yuval Noah Harari 啱啱出嘅新書 Nexus: A Brief History of Information Networks from the Stone Age to AI，見到有個幾有趣嘅故事﹕ 相信唔少人聽過，十六世紀馬丁路德宗教改革前，天主教會係一直壟斷《聖經》嘅解釋權，直到新教嘅出現。但原來作為天主教嘅老祖宗猶太教，都遇過同樣嘅問題... 佢地一早就知道所謂嘅神諭/解釋權呢啲嘢係好容易被濫用，所以早期嘅猶太教精神領袖"拉比"們編選咗《希伯來聖經》並抄寫好幾百份放响唔同嘅地方，好似今日嘅Block Chain咁唔易被篡改。的確，保存原汁原味嘅版本係做得好好，但隨住時代嘅發展及環境變遷，《希伯來聖經》已經唔足以指導猶太人嘅新生活。咁可以點？惟有聽當代新"拉比"們對舊有嘅《希伯來聖經》作出解釋，呢啲新解釋又拼湊出《密釋納》《塔本德》等新版本；而新"拉比"之間又對唔同嘅解釋或版本充滿爭議。舉個例子，《希伯來聖經》只係提及安息日不得工作，咁出門口落樓要撳lift制，撳lift制呢個動作算唔算係工作？屙完屎要抆廁紙吻屎，抆廁紙呢個動作又算唔算工作？"拉比"們係冇一致嘅共識。 講到呢度係唔係有啲似曾相識嘅感覺？《希伯來聖經》就好似官方出版嘅Competence ABCDE，而"拉比"就好似今日嘅考官，每個人對Competence ABCDE嘅理解都唔同。何謂Competence B中嘅"NEW Technologies"? 仲响實驗室未正式商用嘅叫新？定係剛商用五年嘅叫新？有啲考官認為office改用T5管都算新，有啲考官認為CCHP都唔係新嘢。如果大家圍繞住"New Technologies"嘅定義嚟爭議都仲叫好啲，最怕係連《希伯來聖經》都唔睇嘅考官，任由自己發揮及演譯。至於各自解釋呢個問題可以點處理？筆者呢一刻仲未諗到可行嘅方案。講呢個故事嘅目的，係希望各考官及BS從業員進一步思考我地面對緊嘅問題。
[1]: Planto.hk - 香港人月入中位數2024｜幾高人工是全港Top10%？[2]: https://elvissharing.blogspot.com/2022/02/bs-bsreport-knowledge-understanding.html
[3]: https://elvissharing.blogspot.com/2022/02/bs-bsreport-b-design-development-and.html
2024年8月31日星期六
MHKIE / CEng / CPEng考牌常見謬誤及問題
筆者曾協助多位朋友考牌，過程中有些有關考牌的問題經常出現。為免不停重覆回答相同問題，現將我的回答分享給大家。
----------------------------------------------
問1:考某個discipline既牌一定需要果個discipline的學歷嗎?
答1: 大部分外國學會及HKIE discipline都在一定程度上接受非該discipline的學歷。筆者建議以電郵直接向有關學會詢問及確認考牌的學歷要求。
在筆者認識的行家中，有以ELL學歷考獲BSS及MCL資格, 以BSS學歷考獲ELL及MCL資格及以MCL學歷考獲BSS資格。唯獨未聽過有人以純MCL學歷考獲ELL資格。
----------------------------------------------
問2: 考牌需要有果個會既牌既人先可以同我簽名嗎?
答2: 除卻HKIE及ICE, 英國及澳洲的學會大都接受ECUK屬會及/或獲認可外國學會的同級CEng/Member簽名。
詳見下文
http://elvissharing.blogspot.com/2024/04/blog-post.html
問3: 如果我想先考外國既BSS/MCL/ELL牌再轉番去HKIE, 係未只可以考CIBSE/IMechE/IET先得?
----------------------------------------------
答3: 否，多個學會均與HKIE有專業資格互認協議(RRA)。
HKIE的BSS/MCL/ELL各與最少2個學會有RRA，可參閱下文
http://elvissharing.blogspot.com/2024/03/rramhkie.html
----------------------------------------------
問4: 係未做Consultant (顧問公司)先可以考牌?
答4: 否，工作資歷中沒有顧問公司而又考到牌的人也有很多。
----------------------------------------------
問5: 做Main Contractor / Sub Contractor / Facility Management可唔可以考牌?
答5: 可以, 只要滿足到相關學會在學歷, 資歷及能力等的要求, Main Contractor / Sub Contractor / Facility Management背景的人都可以考到牌。
----------------------------------------------
問6: 係未一定要做new build 大project先可以考牌?
答6: 否，所有學會都沒有這個要求。以A&A, fit out, O&M, 細project經驗考到牌的人所在多有。
----------------------------------------------
延伸閱讀:
MHKIE / CEng / CPEng 寫文心法 - Complex Engineering Problems / ECUK Part A & B / Creativity
and Innovation
http://elvissharing.blogspot.com/2024/05/mhkie-ceng-cpeng-complex-engineering.html
問7: 咩職級(Job Title)先可以考牌?
答7: 所有學會的工程師牌在職級(Job Title)上都沒有明文要求，但考官有可能會以你的職級(Job Title)作出某些評估。如考生現職為Assistant Engineer (助理工程師)等較junior的職級, 考官較有可能要求考生提交額外資料證明能滿足“領導團隊”及 “管理預算”等competence. (ECUK
C2, C3 / HKIE Competence 5, 6 / EA Element 10)
問8: 咩學歷先可以考牌?
答8: 原則上，所有獲華盛頓協議認可的學位都可滿足考牌的學歷要求，但是筆者建議以電郵直接向有關學會詢問及確認考牌的學歷要求。
問9: 要幾多年工作經驗先可以考牌?
答9: 不同學會對考牌最少工作經驗的要求未必一樣，筆者建議向有關學會查詢具體要求。
原則上, HKIE的考牌的最低年資要求為4年 [1], 而英國及澳洲則為最少5年[2] [3]。
每個人的能力及職場生涯發展都不一樣，而學會對每個考生都是獨立評估，其他人考到牌的年資並不一定適合作為參考。筆者建議預備考牌的朋友可以定期自行評估是否已滿足學會的考牌要求。尚未滿足的要求可作為繼續進修的參考, 轉工又或是向上司/公司要求調整工作的理由。
至於獲得MHKIE的平均時間, 可參閱下文
http://elvissharing.blogspot.com/2024/03/blog-post_14.html
問10: CPD係未要實體紙本cert才算CPD嗎?
答10: 否，很多學會都接受自修，公司內部培訓及義工等作CPD。
具體要求視不同學會而異，建議向有關學會查詢CPD要求。
問11: 英文唔好可唔可以考牌?
答11: 英國, 香港及澳洲學會的任何考牌面試及文件均以英語進行。
如自問英文程度一般，應勤加練習。
按筆者的感覺，考牌面試所需的英文程度約為IELTS (Speaking and listening) 6.5 至7
問12: 考牌過程要花幾耐時間?
答12: 不同學會的過程所需時間都不一樣。
可參考下文內容
http://elvissharing.blogspot.com/2024/05/mhkie-ceng-cpeng.html
問13: 考牌需要碩士(Master)嗎?
答13: 不一定, 詳見下文
http://elvissharing.blogspot.com/2024/04/master.html
問14: Scheme A係未真係幫到考牌?
答14: 詳見下文
http://elvissharing.blogspot.com/2024/05/hkie-scheme-a.html
筆者:L君
免責聲明
筆者並不代表任何學會及院校。任何人如欲申請文中提及的工程師牌及課程，應諮詢有關學會及院校，並詳閱考牌要求及院校的資訊，筆者並不對以上資料的錯漏，準確程度及可能造成的誤會負任何責任。
[1] M3 Routes to
Membership
https://www.hkie.org.hk/zh-hant/membership/download_mem2/upload/page/189/self/661798d1bb4cf.pdf
[2] UK-SPEC 4th Edition: Summary of Changes
https://www.engc.org.uk/media/3399/uk-spec-4th-edition-summary-of-changes.pdf
[3] Engineers Australia - Chartered
https://www.engineersaustralia.org.au/credentials/chartered
2024年6月24日星期一
氣候變化對避雷系統設計的影響
2024年6月23日凌晨因電力不穩，元朗至深圳的40萬伏特架空供電系統出現短暫電壓驟降，導致部分大廈一度停電。電力公司表示懷疑受到不穩定天氣影響。[1] 盡管事件依然在調查當中，但是極端天氣對機電系統設計的影響卻值得深思。
依據機電工程署的電力(線路)規例工作守則[2]，建築物的避雷裝置可參考IEC
62305、AS/NZS 1768、NFPA 780等標準，而行內普遍選用IEC
62305作設計標準[3]。在設計相應的避雷系統前，往往需要先計算該建築物的被雷擊風險(Risk)系數是否在可承受的數值之下。如否，則施加不同的裝置及/或措施去降低被雷擊的風險系數至可承受的數值之下。
在計算的過程當中，每年的雷暴日數(Thunderstorm days per
year)是一個影響特別明顯的參數。該參數需要參考香港天文台數據[4]。
從天文台數據可見，每年的雷暴日數是有上升的趨勢。較舊的建築物於設計時採用當年的天文台數據去計算被雷擊風險系數及設計相應的避雷裝置。如該設計只是剛好滿足當年的要求，在今時今日的氣候下，該建築物可能被雷擊的風險或已升至可承受的水平之上。情況有如設計上可應付百年一遇洪雨的去水系統需要應付五百年一遇的洪雨。
如大廈內的機電設備經常因雷擊而故障，建築物擁有人可考慮與合資格的工程公司加強避雷系統，亦可考慮增加不間斷電源裝置(UPS)及有過渡電壓驟降能力(Ride
through)的設備去抵禦電力公司供電系統出現的電壓驟降[5]。
筆者: L君
[2] 機電工程署 - 電力(線路)規例工作守則
[3] IEC - IEC 62305
[4] 香港天文台 - 自1947年錄得的雷暴日數
[5] https://www.clp.com.hk/en/power-quality/tips
2024年6月23日星期日
升降機的活塞效應(Piston effect)
近日，有立法會議員提議將港鐵計劃興建的通風大樓設置於地底[1]，引來建造業界不少討論 [2] [3]。其實，部分於列車隧道通風系統設計時的需要考慮的情況，於升降機的設計中亦同樣會出現。
隨著技術進步，新安裝的升降機運行速度愈來愈快，而升降機高速(3.5
m/s及以上)運行時會對升降機井道內的空氣造成擠壓，令空氣需要高速流入及流出，從而出現活塞效應 (Piston effect)。如果沒有適當的處理，升降機高速運行時所擠壓的空氣可以產生噪音，使升降機的外門震動，及於升降機的外門邊洩出並影響升降機大堂附近的空氣流動，可以嚴重影響大廈使用者的體驗。[4]
面對這種情況，有數個可行的解決方法:
1. 調整升降機及其井道的比例，使空氣可以於升降機旁的空間移動，減低空氣被擠壓出升降機井道外的機會。
2. 對於同一井道有多台升降機施加程式限制，避免多台升降機同時於同層向同一方向移動。
以上兩個方法都各有限制。方法一有可能被大廈的設計所限，未能預留足夠空間。方法二則無法應用於井道內只得一台高速升降機的情況。
最徹底的解決方法則是於升降機井道內(最好是靠近井道頂端及底部)設置一定面積的通風口(Louvre)，令被擠壓的空氣可以於該處流走。心水清的朋友應該會發現這個解決方法與港鐵通風大樓的原理是差不多。
筆者: L君
[1] HK01 - 議員倡中環海濱港鐵通風樓改設地底
[2] 張欣宇 Gary - 隧道通風樓的功能
[3] 我係 "橙葉測量師" - 地鐵通風樓
[4] Elevator World MK - Piston Effect English
2024年6月16日星期日
機電佬睇HKIE換屆選舉
本年度的香港工程師學會(HKIE)換屆選舉將會於6月25日舉行。從收到的選舉資料中，今年有二個候選人角逐一個副會長(Vice President)職位，及九個候選人角逐五個理事(Elected Ordinary Member)職位。這十一個人分屬兩個團隊。大部分候選人都是土木，岩土或結構背景。這兩個團隊都各有一個機電背景的候選人競逐EOM，算是都有候選人代表HKIE內約三分一有機電背景的會員。
盡管這些候選人都是資歷深厚，經驗豐富，服務學會多年，選舉資料中卻沒有列出政績及政綱。即使參閱兩個候選團隊其他選舉資料如facebook, linkedin, Instagram等，仍然找不到相關資料。其中一個候選團隊雖然有於linkedin列出5項倡議，但內容籠統，未能具體反映候選人對學會未來發展的願景及承諾。[3] 作為專業工程師，我們期望候選人能提供清晰的計劃和目標，以及如何實現這些目標的具體策略。
作為具投票資格的會員，我們有權利也有責任仔細審查每位候選人的選舉資料。筆者期望各候選人能提供過去為HKIE擔任公職時的政績，而非僅是所擔任的公職及頭銜。筆者也期待各候選人能提供具體的政綱，而非僅是口號及內容不清晰的倡議。
筆者﹕L君
參考資料﹕
1: 共建明天 - HKIE VP EOM Election 2024
2: 薪火相傳 - HKIE VP EOM Election 2024
[3]: 第一隊於6月19日透過HKIE官網補充參選資料
HKIE會員違紀投訴探討
嚟緊6月29日，HKIE會舉行"Stakeholder Engagement Workshop for HKIE Governance Review"，探討學會管治、入會(考牌)、會員紀律等問題。新會長即將上任就有所行動搜集意見，似乎會有一番新景象，實在令人期待及鼓舞。當中嘅考牌問題筆者之前已大量撰文分析問題癥結所在 [1]，今次比較有興趣嘅話題係會員紀律問題。 HKIE有冇資格開board審違紀嘅會員，甚至吊銷或開除佢地嘅會員資格？當然有。我地睇返「HKIE The Ordinance and Constitution (Aug 2022)」[2] 13.(4) “The Council shall…appoint a panel from which Boards of Inquiry…improper conduct of a member...” 有興趣嘅讀者可到註釋查閱原文。 何謂 improper conduct? 除咗上述文件13.(5)提及嘅觸犯刑事罪、以虛假資料獲得會員資格等外，仲要睇埋12. 指向嘅「HKIE Rules of Conduct (May 2023)」[3]。即係「HKIE The Ordinance and Constitution」係母法，而「HKIE Rules of Conduct」係基於母法嘅子法。至於成個審訊流程係點，就要睇「HKIE The Ordinance and Constitution (Aug 2022)」13.(4) (6) (7) 指向嘅「HKIE Disciplinary Regulations (Apr 2013)」[4] HKIE有冇一啲公開資料或紀錄，好似醫委會咁[5]，係可以翻查到有會員被開board審過嘅紀錄？以HKIE為例，真係搵唔到。雖然有幾單零星嘅工程師註冊管理局 Engineers Registration Board ERB 開board紀錄可以响HKIE月刊[6]或ERB官網搵到，不過都係先法庭有裁決嘅情況下，ERB 再補飛暫時吊銷佢地嘅 R.P.E.。順帶一提，HKIE開board同ERB開board係兩回事嚟，後者係跟據 Cap. 409 Engineers Registration Ordinance 21."Inquiry committee and rules of conduct" 成立嘅研訊委員會。如果一個工程師只係攞咗 MHKIE，但冇攞 R.P.E.，意味住 Cap. 409 係管唔到佢地，只有 HKIE 管到。 近期有單各大工程群組流傳[7]，某個女工程師以假公司及假項目經 ECUK RRA 獲得 MHKIE 及 R.P.E.。據悉係有人向 HKIE 及 ERB 投訴並詳述事發經過[8]，但結果係 HKIE / ERB 反過嚟要求投訴人證明為何呢啲項目係唔存在、為何呢啲資料就係屬於被投訴人。 下？？﹗﹗你要投訴人點證明不個唔存在嘅項目係虛構？係唔係 HKIE / ERB 開board翻查下該會員提交過嘅資料(包括ECUK)就得？或要求被告書面回覆並指出該項目嘅位置及公司資料，只要佢講唔出就足以證明其提交嘅係假資料？如果 HKIE / ERB 用呢種萬能邏輯處理投訴，應該任何投訴都唔會開board；甚至係唔可能再有人會被指控"以虛假資料獲得會員資格"，因為HKIE一早就知有人提交假資料的話，入會嗰下已經攔咗佢；肯定係收到有人投訴先會去查，而唔會係HKIE冇事搵事做。 HKIE / ERB 可以如何改善？ 我地可以 Learn from the Best，睇下人地醫委會係點處理投訴。就以最近期嘅一單為例[5]，筆者做咗以下個表以便讀者理解﹕
可以見得，睇落好芝麻綠豆嘅小事，只係有個醫生將佢旗下醫療集團服務嘅四個醫生卡片放上 facebook 專頁，呢啲投訴醫委會一樣會開board處理；而被投訴人及其罪名、研訊委員會成員、事情經過、調查結果、量刑等等，成個過程係有文字紀錄及放上網比公眾查閱。呢啲就係公開、透明、紀律嚴明委員會嘅作用，可以有效規範專業人士嘅行為，從而提升普羅大眾對該專業嘅形象。
假設，我再次強調係假設，「HKIE Rules of Conduct」入面同都有一條類似嘅不得做個人宣傳守則，我地跟據 HKIE / ERB 過往處理投訴所用嘅萬能邏輯，可以預判到佢地會點覆﹕
"請你投訴人證明一下，為何相中人就係L工程師"
"為何你認為呢條 facebook link 一定就係係同 L工程師有關"
"請投訴人證明，為何 facebook 上有卡片，就會聯想到與宣傳有關" etc.
萬能邏輯係可以用嚟拒絕處理任何投訴。
會長或理事會成員要清楚知道，投訴人好可能只係外行人嘅 layman，有時只係憑常識判斷有工程師做咗啲唔合理嘅嘢所以進行投訴。既然如此，就唔可能要求投訴人好似刑事案件咁，有公權力嘅警察負責搜集證據、有專業嘅律政司負責檢視證據並起訴；而係應該學醫委會咁，由HKIE自己主動成立委員會去調查及搜集證據，尤其涉及一啲只有 HKIE / ERB 內部能夠接觸到嘅資料。要知道呢類內部資料，即使係警方都好可能要有法庭令先接觸到，更何況一個只係普羅人眾嘅投訴人。眾所周知，民事訴訟嘅起訴門檻係比刑事低得多，而類似醫委會咁執行 in house rules 嘅門檻又比民事訴訟再低一啲。如果下下子要求投訴人提交刑事案件證據嘅標準先肯處理投訴，應該永遠都唔會有投訴係需要處理。
另外，HKIE / ERB 拒絕處理上述以假資料獲得 MHKIE / R.P.E. 嘅投訴，係開咗一個好壞嘅先例，以致業界已經有人揚言要蠢蠢欲試，欲複制上述女工程師做法。即使 HKIE / ERB 收唔到投訴，呢啲公眾事件都應該主動處理及澄清，而唔係拙劣嘅回應或不作為，任由事件發酵，進一步破壞香港工程師嘅專業形象。
如果有啲HKIE會員違規但唔太惡劣嘅行為，如筆者工作上有個下下下下家(其負責人係HKIE會員)有啲位佢唔想跟工程合約交貨，就搵中間人接觸我想私底下傾掂數，由於佢又冇行賄未夠證據告上ICAC，但呢啲行為明顯係有違「HKIE Rules of Conduct」提及嘅專業操守 。如果呢啲case HKIE會考慮開board予以口頭警告，或好似醫委會咁，判其除牌三個月但緩刑兩年，並將事件以文字紀錄及放上網比公眾查閱，應該可收阻嚇作用及提升專業形象。
最後，有幾多個 layman 知道可以經乜渠道投訴工程師？我相信就算係HKIE嘅會員，應該都唔會好多人識得搵 Division & Special Affairs 個電郵[10]、唔會識得翻查「HKIE The Ordinance and Constitution (Aug 2022)」及「HKIE Disciplinary Regulations (Apr 2013)」等文件及長篇累牘嘅流程。
如果想改善會員紀律問題，重新審視呢單以假資料呃會員資格嘅投訴，會係一個好開始。
[1]: 見作者前文<HKIE RRA 形同虛設 之 考官自訂遊戲規則>；<為何被HKIE Fail 嘅考生會唔服氣>；<考牌的禁忌話題 - 買簽名>；<以真實數據揭示獲得MHKIE的時間>；<考工程師牌遇到唔合理嘅待遇，有冇上訴機制？>
[2]: HKIE The Ordinance and Constitution (Aug 2022)
[3]: HKIE Rules of Conduct; (Google搵到個新啲嘅2003年版本；MHKIE會員Login反而只有2001年版)
[4]: HKIE Disciplinary Regulations;
[5]: 香港醫務委員會 投訴及紀律研訊 二零二四年醫務委員會研訊小組的裁決 2024年4月16日
https://www.mchk.org.hk/tc_chi/complaint/disciplinary.php?type=j&year=2024
[6]: HKIE Vol 48 Jun 2020 “Others” “Public Notice Engineers Registration Board”;
HKIE Vol 54 Apr 2024 “Others” “Public Notice Engineers Registration Board”;
[7]: LIHKG - 唔通靚女就可以係工程界打橫行?，全文要會員登入先可以睇到；
[8]: 據悉被告兜售其考牌報告欲從中獲利，有購賣者發現佢某一年嘅工作經驗、公司及參與項目都係子虛烏有 - "The project "Fuyuan Residential Buildings, Shunde, Guangdong, China" (Responsible for building services on-site construction and management works. It is a 15 floors residential building with car park and swimming pool, GFA is about 13,450 m2) and company "Jianjin Development Limited" mentioned in her report submitted to the Engineering Council (UK) never existed in reality; she invented these names herself."
[9]: 香港註冊醫生專業守則https://www.mchk.org.hk/tc_chi/code/files/Code_of_Professional_Conduct_(Chinese_Version)_2022.pdf
[10]: HKIE - https://hkie.org.hk/zh-hant/connect/contact/
2024年6月12日星期三
適合於考工程師牌(CEng / CPEng / MHKIE) 前考的細牌
工程師牌以外，機電工程/屋宇設備工程行內也有很多不同的資歷適合未有牌的工程師申請。這些資歷可以在考牌時增強自己在某些範疇的說服力，亦可以表達出自己是不斷進修，更可以算作CPD的時數，可以說是一舉數得。
筆者﹕L君
延伸閱讀﹕<[BS] 問﹕除咗BS工程師牌外，仲有邊啲BS相關嘅牌照值得考？>
註:
[1] https://www.emsd.gov.hk/tc/electricity_safety/how_to_apply/registering_as_an_electrical_worker_for_electrical/index.html
[2] https://www.wsd.gov.hk/tc/plumbing-engineering/licensed-plumbers/how-to-apply/application-for-licence/index.html
[3] https://www.beamsociety.org.hk/zh-HK/education/beam-pro-training
[4] https://support.usgbc.org/hc/en-us/articles/4404371728019-About-the-LEED-AP-with-specialty-exam
[5] https://www.bim.cic.hk/zh-hant/certification_and_accreditation/certification_manager_introduction
[6] https://www.hkic.edu.hk/zh-hk/programmes/pro-dev/mgmt/nec4
[7] https://www.labour.gov.hk/tc/osh/mbstcw.htm
[8] https://certification.oshc.org.hk/ASS.html
訂閱：
文章 (Atom)