前會長親自拆台，直考 MHKIE 政策名存實亡

近日，某位香港工程師學會（HKIE）前會長响網上敲鑼打鼓，高調發文恭賀幾位在佢任內欽點嘅 Protégés（親傳門生），成功考獲英國Chartered Engineer。表面睇，係前輩提攜後進嘅溫馨場面；但細心一諗，簡直就係一巴掌車埋嚟，狠狠咁摑響學會近年力推嘅政策臉上。

眾所周知，HKIE 近年喊破喉嚨，甚至幾乎要「跪求」大家走正門——直接考 MHKIE（直考），而唔係走先考外國牌再經 RRA 轉會的路線。點解？因為要直考先能夠證明本地工程師嘅「含金量」，確保香港工程界嘅獨立自主同認受性。

但係呢，呢位前會長是在玩啲乜野？

佢高調恭賀門生考外國牌，潛台詞咪就係攞著大聲公向全港工程師廣播：「傻仔先直考！醒目仔梗係考個外國牌，之後填張 Form 轉番入嚟HKIE就得啦！」

呢一招，簡直是教科書級別嘅「倒米」。學會呢邊廂費神費力，搞講座、開 Workshop、改指引，甚至出動大批義工去宣傳直考 MHKIE 的意義及價值；嗰邊廂，曾經嘅「揸Fit人」就親自帶頭推廣「識考梗係考CEng先啦」。

未考牌嘅小薯們見到咁高調既宣傳，邊個仲會戇xx咁去啃 MHKIE 呢塊難啃嘅硬骨頭？心諗：「成績好, 後台勁, 公司個名咁響Protégés都唔直考MHKIE，我無人無物, 出身細公司既小薯更加唔洗講啦, 擺低一蚊跟機考CEng先係正路」結果就是更多人湧去考外國牌，原本已經少人既直考政策及宣傳就淪為廢紙。

呢種制度性咁依賴外國認證嘅現象，唔單止關乎專業尊嚴，更直頭關係到香港喺關鍵領域嘅自主性同國家安全，例如基建、交通、能源、資訊科技等呢啲重要範疇嘅安全。如果工程師制度確保唔到香港喺呢啲關鍵專業領域嘅獨立自主，長遠落去，就會削弱香港作為國際城市嘅核心競爭力，甚至成為國家安全嘅薄弱環節。