HKIE「N展聯盟」之「工程師•話你知」

偶然打開HKIE send 嚟嘅email, 見佢地搞咗個「N展聯盟」「工程師•話你知」「絕密流出﹗」，click入去睇，果然有趣。 首先係一段收音好差嘅影片[1]，內容大概係﹕「我覺得千層蛋糕 ≈ 起樓工程，因為 i) 都係一層層冧上去；ii) 落石屎都係要控制溫度時間。」仲有一段﹕「我覺得潤滑劑 ≈ 工程師，因為 i) 齒輪要用到；ii) 工程師需要協作溝通。」 呢類牽強附會嘅比喻，筆者同樣可以以"排便"去比喻起樓工程﹕

「大廈嘅排污系統好比人體嘅排便系統、Grease Trap好比人體臨時儲存排泄物嘅地方、工程師好比排泄系統嘅各個器官，相互合作。」
至於舉咗啲牽強附會嘅比喻創造咗啲乜價值，筆者實在答唔出；要用GPT要創作一千幾百個呢啲冇價值嘅比喻，撳個掣幾秒鐘就得。 HKIE報稱今次嘅觀眾對象係中小學生[2]。但佢地有冇諗過，即使三歲細路哥砌積木冧高高都識得要一層層砌上去，難度真係要所謂嘅工程師用千層蛋糕做比喻會更容易理解到起樓係要一層層咁起？此外有啲比喻係明顯係用錯，例如落石屎後係冷却過程，而烘培蛋糕係加熱過程，呢類比喻明顯有誤導之嫌。 另外，呢類又絕密又流出嘅標題，同嗰啲網絡內容農場(content farm)[3]嘅垃圾文章標題，如「震驚﹗原來地球是一塊平面﹗地球是圓的係世紀謊言﹗」[4]有乜分別？有冇諗過係邊啲水平嘅人先會click入去睇呢類標題嘅文章？乜HKIE唔係成日強調專業？究竟呢啲自相矛盾on9當有趣嘅標題有幾專業？﹗

仲有其中一條片，係小學生問工程師，澳門新濠影匯中間點解有兩個窿[5]，見圖﹕
工程師回答嘅只係一堆似是而非嘅facts，例如工程師係會考慮個窿大細/方向/照明/對流/外觀云云。但佢答嗰陣有冇諗過，呢個窿係建築群嘅必需？難度冇做呢個窿嘅建築群，照明/氣流/結構都會出問題？事實有好似唔係噃，大把類似規模及高度嘅建築群都冇做呢個窿。另外，個窿大細及外觀，係建築師主導設計，而唔係工程師。究竟係為答而答，定真係為咗解答提問者嘅疑問去回答？又抑或楂住鎚嘅人，見到乜都覺得係釘？係唔係應該答得直接啲，嗰兩個窿係八字摩天輪，係一個商業決定嚟；而工程師嘅職責，係設計及施工期間點解決多咗兩個窿後嘅工程問題，如解決結構完整性、建築物料、施工技術、成本等問題，以滿足呢個商業決定？係唔係應該大方直接啲去承認，個窿減低結構風載、屏風效應等都只係呢個商業決定下嘅副產品？

HKIE選擇拍呢類短片嘅目的實在令人難以理解。如果要有宣傳效果，最起碼係有趣有娛樂性；如果打算提供有用嘅資訊，亦起碼要水平比GPT高，否則人地何解要專登click入嚟睇片而唔係問GPT。好可惜，佢地上述兩個目的都做唔到之餘，仲有反效果，令下一代印象中嘅香港專業工程師只係如此水平。 [1]﹕第零話 集合吧！N展聯盟✨ https://www.facebook.com/watch/?v=1072252990938969
[2]: 「工程師•話你知」短片系列 https://hkie.org.hk/en/news/event_detail/678/#:~:text=The%20Hong%20K
[3]: 肉容農場(content farm)
[4]: 地平說
[5]: 【工程師•話你知】EP1 - 建築物的獨特設計